समाचारहरू

सदरमुकाम सिमकोटबाट एक दिन पैदल यात्रामा पुगिने खार्पुनाथ गाउँपालिका-३ स्थित राया स्वास्थ्य चौकीमा जेठ १० गतेबाट औषधि अभाव भएको छ । जिल्ला जनस्वास्थ्य कार्यालयबाट आउनु पर्ने औषधि नआएपछि स्वास्थ्य चौकीमा औषधि अभाव भएको बताइएको छ ।

झाडापखाला लागेका बिरामीलाई दिइने औषधि स्वास्थ्य चौकीमा नभएपछि खार्पुनाथ गाउँपालिका-३ का ३५ वर्षीय हर्क बुढालाई सोही गाउँपालिका-४ स्थित छिप्रा स्वास्थ्य चौकीमा करिब तीन घण्टाको पैदल बाटो बोकेर औषधि गर्न लगिएको बिरामीका आफन्त पूर्णबहादुर बुढाले गुनासो गरे ।

केही दिन अघि चार महिनाकी एक बालिका उपचार गराउन लैजाने क्रममा बाटोमै मृत्यु भएको मृतक बालिकाका बुवा रामजीते सुनारले जानकारी दिए । स्वास्थ्य चौकीमा ४२ प्रकारका औषधि हुनुपर्ने भए पनि जेठ १० गतेदेखि सिटामोल, जीवनजल, मेट्रोसमेत नभएको स्थानीयबासी नन्द बुढाले बताए ।

उक्त गाउँमा आँखा पाक्ने, झाडापखाला, रुघाखोकीलगायतका बिरामी बढेको भए पनि स्वास्थ्य चौकीमा एक जना अनमी बाहेक अन्य स्वास्थ्यकर्मीसमेत नभएको बुढाले गुनासो गरे । कार्यालय सहयोगीसहित पाँच जनाको दरबन्दी भएपनि एक जना अनमीबाहेक अरु सबै कर्मचारी तालिम भनेर सिमकोट र सुर्खेत गएको स्थानीबासी जगतबहादुर शाहीले बताए ।

गत फागुनबाट राया, काराङ्ग र थालीका करिव १ सय ५७ जना बालबालिकालाई कुनै खोपसमेत नलगाएको स्थानीयबासीले जनाएका छन् । जिल्लामा पर्याप्त मात्रामा औषधि ढुवानी नहुँदा औषधिको अभाव भएको जिल्ला जनस्वाथ्य कार्यालयका निमित्त कार्यालय प्रमुख विष्णु शाहीले बताए ।

नन्द सिंह