समाचारहरू

सोरु गाउँपालिका -९ स्थित खनाया स्वास्थ्य चौकीमा असार १० गतेदेखि औषधिको अभाव भएको छ । औषधी अभाव हुँदा सो वडाका खनाया,सिडी र कालै गाउँका सर्वसाधारण मर्कामा परेका छन् ।

दुई दिनदेखि ज्वरो आएका एक वर्षीय छोरालाई छोरालाई स्वास्थ्य चौकीमा उपचारका लागि लगेकोमा स्वास्थ्यकर्मीले सिटामोल नभएको बताएपछि औषधी किन्न तीनघण्टा हिँडेर सोरु गाउँपालिका-—७ सिप जानुपरेको तिर्थ शाहीले बताउनु भयो ।

७५ वर्षीया आमालाई झाडापखाला लागेको र उपचारका लागि अस्पताल लैजाँदा जीवनजल नपाएको नरनाथ योगीले बताउनु भयो । खनाया स्वास्थ्य चौकीमा असार १० गतेदेखि सिटामोल, जीवनजललगायतका औषधि अभाव भएको हो । औषधि अभाव हुँदा  स्वास्थ्य चौकीमा आउने दैनिक १० देखि २० जनासम्म बिरामीलाई खाली पठाउनु परेको खनाया स्वास्थ्य चौकीकी अनमी तुलसा बिश्वकर्माले जानकारी दिनु भयो ।

पालिकाले औषधि खरिदमा पर्याप्त बजेट नछुट्याउँदा र जिल्ला स्वास्थ्य कार्यालयले उपलब्ध गराउने औषधि समयमै स्वास्थ्य चौकीमा नपुग्दा बेला बेलामा औषधी अभाव हुने गरेको सोरु गाउँपालिका-९ का वडा अध्यक्ष सागर शाहीले जानकारी दिनु भयो ।

सोरु गाउँपालिकाका स्वास्थ्य संयोजक चरित्र धामीले  खनाया स्वास्थ्य चौकीमा मात्र नभई अरु स्वास्थ्य केन्द्रमा समेत  औषधि अभाव भएको भन्ने जानकारी आएको छ । केही दिन भित्रमा सबै स्वास्थ्य केन्द्रमा औषधी व्यवस्थापन गरिने बताउनु भयो ।

जीवन सेजुवाल