समाचारहरू

चम्पादेवी गाउँपालिका –१० रानीवनमा रहेको प्राथमिक स्वास्थ्य केन्द्रमा एक्सरे मेसिन नहुँदा सर्वसाधारण उपचारबाट बञ्चित भएका छन् ।

स्वास्थ्य केन्द्रले तीन महिना अघि सञ्चालनमा ल्याएको मेसिन बिग्रिएपछि उपचारमा आउने बिरामीले एक्सरे सेवा नपाएका हुन् ।

जिल्ला स्वास्थ्य कार्यालय अन्तरगत रहेको एक मात्र स्वास्थ्य केन्द्रमा लिखु तथा चम्पादेवी गाउँपालिकाका –१९ वडाका नागरिकले उक्त स्वास्थ्य संस्थाबाट उपचार सेवा लिने गरेका छन् ।

सञ्चालनमा आएको एक्सरे मेसिन तीन महिनामै बिग्रेपछि समान्य चोटपटक लागेका र अन्य रोगमा औषधी सिफारिस पूर्व परीक्षणका क्रममा एक्सरे गर्नुपर्ने भए पनि मेसिन नहुँदा समस्या रहेको स्वास्थ्य व्यवस्थापन समितिका अध्यक्ष उज्जन बुढाथोकीले बताउनुभयो । पुरानो मोडलको मेसिन भएकाले मर्मत हुन नसक्ने उहाँको भनाइ छ ।

दैनिक ५० जनाभन्दा बढी बिरामी उपचारका लागि आउने गरेका छन् । एक्सरे मेसिन मर्मतका लागि गाउँपालिकामा समन्वय भइरहेको अध्यक्ष बुढाथोकीको भनाइ छ ।

मेसिन विग्रेको दुई हप्ता वितेपनि गाउँपापालिकाले चासो दिएको छैन । जिल्ला स्वास्थ्य कार्यालयमा समस्या जानकारीमा नआएको कार्यालयका प्रमुख सुमन तिवारीले बताउनुभयो ।

स्वास्थ्य केन्द्रमा डाक्टर नबस्ने, औषधी नहुँने समस्याले उपचारबाट बञ्चित त्यस क्षेत्रका नागरि दुई हप्ता यता एक्सरे मेसिन नचलेपछि छिमेकी जिल्ला रामेछाप उपचारका लागि धाउन बाध्य भएको स्थानीय रामहरि थापाले गुनासो गर्नुभयो ।

यस क्षेत्रको स्वास्थ्य समस्याबारे गाउँपालिकाले वेवास्ता गरेको उहाँको आरोप छ ।

शिवप्रसाद ढुङ्गाना