स्वास्थ्य चौकी भवन नहुँदा उपचारमा समस्या

  ०७३ भदौ २२ गते

छथर ओख्रे गाविसमा स्वास्थ्य चौकीको भवन नहुँदा उपचारमा समस्या हुँदै आएको छ । दक्षिणी क्षेत्रमा रहेको जिल्लाकै ठूलो गाविसमा रहेको स्वास्थ्य चौकीको भवन नहुँदा बिरामीहरूको उपचारमा समस्या हुँदै आएको हो ।

स्वास्थ्य चौकीको भवन नहुँदा बिरामी भएर आउने बिरामीहरूलाई उपचार गराउन समस्या हुने गरेको स्वास्थ्य चौकीका अहेब तेजबहादुर भण्डारीले बताए । उनका अनुसार स्वास्थ्य चौकीमा सुदाप र ओख्रे गाविसका बिरामीहरूको चाप बढेकाले भुँइमा नै राखेर उपचार गर्नुपर्ने बाध्यता रहेको छ ।

भवन निमार्णका लागि स्थानीयहरूले पटकपटक सल्लाह र परामर्श गर्दा पनि ठोस निर्णय हुन नसकेको स्थानीयको भनाइ छ । स्थानीय राजेन्द्र न्योपानेले २०५१ सालमा आफ्ना स्वर्गीय आमाबुवाको नाममा निर्माण गरेको दुई कोठे ढुङ्गामाटो र टिनको छानो भएको घरबाट स्वाथ्य चौकीले सेवा प्रवाह गरिरहेको स्वाथ्य चौकीका अहेब भण्डारीले बताए ।

२० वर्षअघि स्थानीयले निर्माण गरेको भवन भूकम्पका कारण चर्किएर जीर्ण बनेको छ । सरकारको मापदण्ड अनुसारको भवन हुनु पर्ने भए पनि अहिले स्वास्थ्य चौकी मापदण्ड विपरित सञ्चालन गर्न आफूहरू बाध्य भएको स्वास्थ्य चौकीका अहेब भण्डारीले बताएका छन् । स्वास्थ्य चौकीको भवन निर्माणका लागी आफ्नै ५ रोपनी जग्गा हुनु पर्ने प्रावधान आएका कारण पनि भवन निर्माणमा ढिलाइ भएको उनको भनाइ छ ।

दुई वर्षपहिले स्थानीय ओख्रे-७ का खगेन्द्र लिम्बुले पाँच रोपनी जग्गा स्वास्थ्य चौकीलाई प्रदान गरेका थिए । स्वास्थ्य चौकीको भवन निर्माणका लागि स्थानीयले निशुल्क जग्गा दिएपनि अहिलेसम्म स्वास्थ्य चौकी निर्माण हुन नसकेको स्थानीय डोलन तिगेलाले बताए ।

सरकारले गाउँबस्ती सम्म नै सेवा पुर्‍याउने घोषणा गरे पनि भवन अभावमा यहाँका स्थानीयले सेवा लिन सास्ती व्यहोर्दै आएका छन् । दैनिक ३० देखि ३५ जना बिरामीले सेवा लिने गरेको उक्त स्वास्थ्य चौकीमा भवन निर्माणका लागि सम्बन्धित सरोकारवाला निकायले चासो दिनुपर्ने स्थानीय युवा प्रदिप सुब्बा बादलले बताए ।

जिल्ला जनस्वास्थ्य कार्यालयका प्रमुख डाक्टर चुमललाल दाशले भवन निर्माणका लागि पहल भइरहेको बताएका छन् । ओख्रे स्वास्थ्य चौकी भवन अभावबारे आफूलाई जानकारी प्राप्त भएकोले यसबारेमा विभागमा चाँडै जानकारी गराउने बताए । स्वाथ्य चौकी भवन निर्माण भए ओख्रे र सुदाप गाविसका ५ हजारभन्दा बढी स्थानीयबासी लाभान्वित हुने बताइएको छ ।


भगिश्वर लिम्बु