स्वास्थ्यकर्मी नै क्वारेन्टाइनमा बस्दा सेवाग्राही समस्यामा

  ०७६ चैत २० गते

कोरोना(कोभिड–१९) सङ्क्रमणको आशंका भएको भन्दै स्वास्थ्यकर्मीको टोली नै क्वारेन्टाइनमा बसेपछि दैनिक स्वास्थ्य सेवा प्रभावित हुन पुगेको छ ।

षडानन्द नगरपालिकाका वडाका स्वास्थ्य चौकीमा सेवारत १७ जना स्वास्थ्यकर्मी नै सङ्क्रमणको जोखिम भएको भन्दै क्वारेन्टाइनमा बसेपछि स्वास्थ्य सेवाग्राहीलाई समस्या भएको छ ।

वैदेशिक रोजगारको शिलशिलामा कतारबाट घर फर्किएका षडानन्द नगरपालिका –१ नेपालेडाँडाका एक युवकको स्वास्थ्य परीक्षण गरेपछि सङ्क्रमणको जोखिम भएको भन्दै १७ जना स्वास्थ्यकर्मी नगरपालिकाले बनाएको क्वारेन्टाइनमा बसेका छन् ।

स्वास्थ्यकर्मी क्वारेन्टाइनमा बसेपछि स्वास्थ्य चौकीमा सिटामोलसम्म दिने मान्छे छैन । चैत १३ गतेबाट नगरपालिकाका –१, २, १०, ११, र १२ का स्वास्थ्य चौकीका १७ जना क्वारेन्टाइनमा छन् । जसमध्ये ११ जना गान्धी मेमोरियल हस्पिटल र बाँकी ६ जना हेल्थ डेस्क राखिएको क्वारेन्टाइनमा छन् ।

चैत ११ गते पाँच जना स्वास्थ्यकर्मीको आरआरटी टोलीले कतारबाट आएका ती युवाको घरमै पुगेर स्वास्थ्य चेकजाँच गरेका थिए । चेकजाँचपछि अन्य १२ जना स्वास्थ्यकर्मीसँग एकआपसमा सँगै खाना खाएको, बसेको, हिँडेकोले जोखिम हुन सक्ने भन्दै स्वास्थ्य चौकी नै रित्ताएर क्वारेन्टाइनमा बसेका छन् ।

कोरोनाको आशंकामा स्वास्थ्यकर्मी नै क्वारेन्टाइनमा बसेपछि सेवाग्राही मारमा परेको नेपालेडाँडाका स्थानीय सन्तोष राईले बताउनु भयो । उहाँले भन्नु भयो, ‘स्वास्थ्य चौकी नै रित्ताएपछि हामीले कहाँबाट सेवा लिने, यस्तो लापारबाही गरेर उनीहरू आनन्दले क्वारेन्टाइनमा छन्।’

कतारबाट आएका ती युवालाई पनि नगरपालिकाको कृषि भवनमा बनाइएको क्वारेन्टाइनमा राखिएको छ । उनको १४ दिन पुगेपछि क्वारेन्टाइनबाट सबै स्वास्थ्यकर्मी पुनः काममा फर्किने नगरपालिकाका स्वास्थ्य शाखा प्रमुख सुन्दर श्रेष्ठले बताउनु भयो ।

औषधि, चेकजाँच, उपचारका लागि स्वास्थ्य चौकी धाउने सर्वसाधरण सेवा नपाएर फर्कनु परेको स्थानीयको गुनासो छ । स्वास्थ्य चौकीमा स्वास्थ्यकर्मी नै नभेटेपछि बजारका मेडिकलबाट औषधि लिन बाध्य भएको दिङ्लाका स्थानीय दावा शेर्पाले बताउनु भयो ।

विपद्को अवस्थामा स्वास्थ्यकर्मी कोरोनाको आशंकामा चुपचाप क्वारेन्टाइनमा बस्दा सेवाबाट वञ्चित हुनुपरेको उहाको स्थानीयको गुनासो छ ।

नगरपालिकाकी उपमेयर मेरीका राईले स्वास्थ्यकर्मीले असुरक्षित महसुश गरेपछि क्वारेन्टाइनमा बसेको बताउनु भयो ।


गणेश विष्ट