स्वास्थ्यकर्मी अभाव हुँदा सेवाग्राही समस्यामा

  ०७६ पुस २९ गते

खिजीदेम्वा गाउँपालिकाका ६ ओटा स्वास्थ्य संस्थामा तीन महिनादेखि स्वास्थ्यकर्मी अभाव हुँदा सर्वसाधारण उपचारबाट बञ्चित भएका छन् । गाउँपालिकाका ९ ओटा वडामध्ये ६ ओटामा स्वास्थ्य संस्था छन् । साविकका ३ ओटा स्वास्थ्य चौकीमा प्रसुति गृह सञ्चालित छन् ।

प्रसुति गृह भएकामा एसबिए (प्रसुति गराउने आधारभूत) तालिम लिएका नर्सिङ कर्मचारीसहित २१ स्वास्थ्यकर्मीको दरबन्दी रहेकोमा हाल ६ जना मात्रै कार्यरत छन् । १२ जना अहेबको दरबन्दीमा ३ जना र अन्य अनमी गरि ६ जना कार्यरत रहेको स्वास्थ्य शाखा प्रमुख इन्द्र गौतमले बताउनुभयो ।

दरबन्दी अनुसारका स्वास्थ्यकर्मी नहुँदा बिरामीको उपचारमा समस्या भएको गौतमले बताउनुभयो । प्रसुति गृह र स्वास्थ्य चौकीमा स्वास्थ्यकर्मी तीन महिनादेखि अभाव छ । कर्मचारी समायोजन अघि नै अभाव रहेकोमा समायोजनपछि सरूवा भएर गएपछि नयाँ नआएकाले समस्या भएको स्वास्थ्य शाखा प्रमुख गौतमले बताउनुभयो ।

स्वास्थ्यकर्मी र आवश्यक औषधि नपाउँदा समस्या भएको खिजीदेम्वाका निमा शेर्पाले गुनासो गर्नुभयो । गाउँपालिकाले स्वास्थ्यकर्मी र औषधि व्यवस्थापनमा चासो नदिएको उहाँको आरोप छ ।
गाउँपालिकाका तीन ओटा वडामा स्वास्थ्य चौकी नभएकाले स्वास्थ्य इकाई स्थापना गरेर एकएक जना स्वास्थ्यकर्मी खटाएको छ । ती इकाईमा पनि औषधि, बिरामीले खोजेको समयमा स्वास्थ्यकर्मी उपलब्ध नहुने स्थानीयको गुनासो छ ।

स्वास्थ्यकर्मी र औषधि नभएकै कारण गाउँमा समस्या पर्दा समेत छिमेकी जिल्ला रामेछाप धाउनु परेको भूसिंगाका पुटी शेर्पाले बताउनुभयो । ‘पहिलेभन्दा अहिले गाउँमा सिटामोल पनि भनेको बेला पाउन सकिदैन’ शेर्पाले भन्नुभयो । गाउँपालिकाले चालु आर्थिक वर्षमा अहिलेसम्म औषधि खरिद गरेको छैन । गत वर्षको स्टकबाट काम चलेको र चाँडै खरिद हुने स्वास्थ्य शाखा प्रमुख गौतमको भनाइ छ ।

स्वास्थ्यकर्मी भने सरकार नै खटाउने भएकाले कहिलेसम्म पदपूर्ति हुने भन्ने यकिन भएको गाउँपालिकाको भनाइ छ । अन्य गाउँपालिकामा पनि स्वास्थ्यकर्मी र औषधिको समस्या छ ।

स्वास्थ्य संस्थामा औषधि तथा स्वास्थ्यकर्मी व्यवस्थापन, सामुदायिक अस्पताल ओखलढुङ्गामा उपचारका क्रममा हुने लापरबाहीका विषयमा अनौपचारिक क्षेत्र सेवा केन्द्र(इन्सेक) सोच नेपाल र टिआई नेपालको समन्वयमा जिल्ला समन्वय समिति, सिद्धिचरण नगरपालिका र जिल्ला प्रशासन कार्यालय ओखलढुङ्गाको ध्यानाकर्षण गराइएको महिला मानवअधिकार रक्षक रीता श्रेष्ठले बताउनुभयो ।

नेपालको संविधानले स्वास्थ्यलाई मौलिक हकको रूपमा स्थापित गरेकाले नागरिकको अधिकार सुनिश्चित गर्न खबरदारी गरिएको श्रेष्ठको भनाइ छ ।


शिवप्रसाद ढुङ्गाना