समाचारहरू

आमाछोदिङमो गाउँपालिकामा दरबन्दी अनुसारको स्वास्थ्यकर्मी नहुँदा सुरक्षित सुत्केरी गराउन खुलेका सरकारी बर्थिङ सेन्टरहरू प्रभावित छन् ।

आमाछोदिङमो गाउँपालिकामा २० जना स्वीकृत स्थायी दरबन्दी मध्ये नौ जना मात्र स्थायी स्वास्थ्यकर्मी कार्यरत छन् । त्यहाँ पाँच स्वास्थ्य चौकी र तीन ओटा सामुदायिक स्वास्थ्य इकाई छन् ।

गाउँपालिकाकाले करार सेवामा लिएका अहेव, अनमी, नर्स गरी १३ जना स्वास्थ्यकर्मी छन् । करारका दुई जना अनमी मात्र एसविए तालिम प्राप्त छन् । सुरक्षित मातृत्व सेवा (एसविए) तालिम नलिएकाले सुत्केरी गराउन पाउँदैन ।

सरकारले मातृ सिशु सेवा कार्यक्रम अन्तर्गत गाउँ गाउँमा आमा र सिशु मृत्युदर न्यून गर्न, नियमित आठ पटक गर्भजाँच तथा सुरक्षित सुत्केरी गराउन बर्थिङ सेन्टर खुलेपनि औषधि र स्वास्थ्यकर्मी समयमा नभएको कारण सेवा प्रभावकारी हुन नसकेको आमाछोदिङमो गाउँपालिका–३ का स्थानीय सिता तामाङको गुनासो छ ।

बेला बेलामा औषधि र स्वास्थ्यकर्मी अभाव हुनाले समस्या परिरहेको आमाछोदिङमो गाउँपालिका–२ को स्थानीय दिपा तामाङले भन्नुभयो ।

सुत्केरी गराउने बारे ज्ञान भएपनि सुरक्षित मातृत्व (एसविए) तालिम नलिएकालाई बर्थिङ स्टाफ मानिँदैन । त्यसैले धेरै बर्थिङ सेन्टर नाम मात्रको भएको तामाङले बताउनु भयो ।

आमाछोदिङमो गाउँपालिकामा पाँच स्थानमा बर्थिङ सेन्टर छन् तर सुत्केरी गराउन त्रिशूली वा काठमाडौँ जानुपर्ने बाध्यता परेको आमाछोदिङमो गाउँपालिका-४, गोल्जुङका स्थानीय च्याङबा तामाङले जानकारी दिनुभयो ।

सरुवा भएर जाने तर नआउने समस्या भएको र स्थायी दरबन्दीका कर्मचारी माग भएपनि प्रदेश  लोक सेवा आयोगले पठाउन ढिलाइ गरेको स्वास्थ्य शाखा प्रमुख निमा तामाङले बताउनुभयो ।

गाउँपालिकाले करारमा कर्मचारी नियुक्त गरेपनि उनिहरू कतिबेला स्थायी कर्मचारी आउँछन् र जागिर जान्छ भन्ने त्रासमा रहेको तामाङले भन्नुभयो ।

जिल्ला स्वास्थ्य कार्यालय नभएको र स्थानीय तहमातहतका स्वास्थ्य चौकीहरूले जिल्लामा हुने स्वास्थ्य कार्यालयलाई अहिले प्रतिवेदन दिने वा अन्य काम नगरेको तामाङले जानकारी दिनुभयो ।

स्वास्थ्यकर्मीको अभाव हुन नदिन गाउँपालिका जोड तोडले लागेको र स्थायी कर्मचारी पनि माग गरिएको आमाछोदिङमो गाउँपालिका अध्यक्ष बुचुङ तामाङले बताउनुभयो ।

हेमनाथ खतिवडा