समाचारहरू

लर्ड बुद्ध एजुकेशनल एकेडेमी लिमिटेड नेपालगञ्ज मेडिकल कलेजका स्वास्थ्यकर्मीहरूको मागको सम्बोधन गर्न मानव अधिकारकर्मीहरूले आग्रह गरेका छन् ।

मानव अधिकारकर्मीहरूले ०८१ पुस ८ गते विज्ञप्ति जारी गर्दै लर्ड बुद्ध एजुकेशनल एकेडेमी लिमिटेड नेपालगञ्ज मेडिकल कलेजको व्यवस्थापन पक्षसँग विगत ६ महिना अघिदेखि विभिन्न मागहरू राखि उक्त संस्थामा क्रियाशिल स्वास्थ्यकर्मी, कर्मचारी युनियन, कर्मचारी सङ्घले गरेको आन्दोलन र त्यस आन्दोलन प्रति व्यवस्थापन पक्षले देखाएको उदासीनताले नागरिकको स्वास्थ्य उपचारमा प्रभाव पारेको भन्दै ध्यानाकर्षण भएको जनाएको हो ।

संस्थागत सुधारका साथै तलब भत्ता, सेवा सुविधा वृद्धि र वृत्ति विकासका माग सहित गरिएको कर्मचारीहरूको श्रम ऐनले दिएको अधिकार कुण्ठित भइरहेको विज्ञप्तिमा उल्लेख छ ।

विज्ञप्तिमा भनिएको छ, 'श्रमिकहरूको जायज मागहरूको तत्काल सम्बोधन गर्न, समस्याको निकास खोजी कर्मचारीहरूलाई नियमित काममा फर्किने वातावरणको सृजना गर्न तथा बिरामीहरूको स्वास्थ्य जस्तो संवेदनशिल विषयमा खेलवाड नगरी नागरिकको गुणस्तरीय सेवा पाउने अधिकारको संरक्षण गर्न सम्बन्धित पक्ष समक्ष आग्रह गर्दछौँ ।'

विज्ञप्ति मार्फत अधिकारकर्मीहरूले श्रमिकहरूले आफ्नो श्रमको उचित मुल्य तथा आफ्ना अधिकारका लागि जायज मागहरू राख्दा व्यवस्थापन पक्षले गम्भीर रूपमा नलिइ बेवास्ता गरिनु स्वास्थ्य जस्तो संवेदनशिल क्षेत्रमा दैनानुदिन आउने बिरामीहरूको स्वास्थ्य उपचारमा समेत प्रत्यक्ष असर परिरहेको सन्दर्भमा आन्दोलनको १३ दिन बितिसक्दा समेत सहि समाधान नखोजिने कार्यले व्यवस्थापकीय कमजोरी देखिएको समेत मेडिकल कलेजको व्यवस्थापन पक्षलाई स्मरण गराएका छन् ।

ध्रुबराज शर्मा