समाचारहरू

सप्तरी स्थायी घर भइ पाँचखपन नगरपालिका-२ टाइगरचोकस्थित नागरिक आरोग्य सेवा केन्द्र, पाँचखपनका इञ्चार्ज ४० वर्षीय ज्ञानेन्द्रप्रसाद शाहमाथि हातपात घटनाका आरोपितलाई प्रहरीले गिरफ्तार गरेको छ ।

स्वास्थ्यकर्मीलाई हातपात गरेको आरोपमा प्रहरीले पाँचखपन नगरपालिका-२ का ४० वर्षीय भीषण जिमीलाई भदौ ३ गते गिरफ्तार गरेको हो ।

स्वास्थ्यकर्मीमाथि हातपात घटनाका आरोपितलाई अनुसन्धानका लागि ०८१ भदौ ३ गते घरबाटै गिरफ्तार गरिएको जिल्ला प्रहरी कार्यालयका इन्स्पेक्टर रामकुमार लामिछानेले बताउनु भयो ।

आरोपित जिमीले ०८१ भदौ २ गते औषधि लिने बहानामा कार्यालय प्रवेश गरेर स्वास्थ्यकर्मी शाहलाई हातपात गरेका थिए ।

औषधि लिने बहानामा कार्यालय प्रवेश गरेका जिमीले शाहलाई हातपात गरेको जिल्ला आयुर्वेद स्वास्थ्य केन्द्र प्रमुख रामप्रमोद चौधरीले बताउनु भयो । पीडित शाहले भदौ ३ गते इलाका प्रहरी कार्यालय, वानामा मौखिक उजुरी दिनु भएको थियो । पीडितले आरोपितविरूद्ध जिल्ला प्रहरी कार्यालयमा भदौ ४ गते लिखित उजुरी दिएको इन्स्पेक्टर लामिछानेले बताउनु भयो ।

आरोपितविरूद्ध प्रहरीले जिल्ला अदालतमा भदौ ४ गते अभद्र व्यवहार शीर्षकमा मुद्दा दर्ता गरी कारबाही अघि बढाएको छ ।

मानव अधिकार रक्षकसम्बन्धी घोषणापत्र सन् १९९८ ले स्वास्थ्यकर्मीलाई मानव अधिकार रक्षकका रूपमा परिभाषित गरेको छ ।

भविन कार्की