समाचारहरू

सप्तरी स्थायी घर भइ पाँचखपन नगरपालिका-२ टाइगरचोकस्थित नागरिक आरोग्य सेवा केन्द्र, पाँचखपनका इञ्चार्ज ४० वर्षीय ज्ञानेन्द्रप्रसाद शाहमाथि भदौ २ गते हातपात भएको छ ।

कार्यालयमा काम गरिरहेको अवस्थामा ०८१ भदौ २ गते पाँचखपन नगरपालिका-२ का ४० वर्षीय भीषण जिमीले हातपात गरेको पीडितको आरोप छ ।

औषधि लिने बहानामा कार्यालय प्रवेश गरेका जिमीले शाहलाई हातपात गरेको जिल्ला आयुर्वेद स्वास्थ्य केन्द्र प्रमुख रामप्रमोद चौधरीले बताउनु भयो ।

हातपात लगत्तै पीडितले पाँचखपन नगरपालिका-२ टाइगरचोकस्थित प्रहरी पोष्टमा उजुरी गर्नु भएको थियो । आरोपितलाई प्रहरीले गिरफ्तार गरी केही समय पश्चात रिहा गरेको थियो ।

तर, आरोपित जिमी घटना भएको राति ११ बजे खुकुरी लिएर शाह बस्दै आएको कोठामा पुगेर धम्की दिनुका साथै ढोकामा लात्ती प्रहार गरेर फर्किएपछि पीडितले भदौ ३ गते इलाका प्रहरी कार्यालय, वानामा उजुरी दिनु भएको छ ।

मानव अधिकार रक्षकसम्बन्धी घोषणापत्र सन् १९९८ ले स्वास्थ्यकर्मीलाई मानव अधिकार रक्षकका रूपमा परिभाषित गरेको छ ।

घटनामा संलग्नको खोजी थालिएको प्रहरीले जनाएको छ ।

भविन कार्की