स्वास्थ्यकर्मीको व्यवस्थापन नहुँदा सेवाग्राही मर्कामा

  ०७९ भदौ ९ गते

नेचासल्यान गाउँपालिका–३ बतासेकी ३३ वर्षीया ममता राई दाँतको उपचार नभएपछि  प्राथमिक  स्वास्थ्य केन्द्र सल्यानबाट भदौ ७ गते घर फर्कँदै गरेको अवस्थामा तिङ्लामा भेटिनु भयो ।

गाउँको स्वास्थ्य चौकीमा उपचार सम्भव नभएपछि तीन घण्टाको पैदल यात्रापछि प्राथमिक स्वास्थ्य केन्द्र पुग्नु भएकी राईले स्वास्थ्य केन्द्रमा चिकित्सक नहुँदा उपचार नगराई फर्किएको गुनासो गर्नु भयो ।

साउन १ गतेदेखि करार, ज्यालादारी वा अस्थायी नियुक्ति भएका सबैलाई गाउँपालिकाले म्याद थप नगरेपछि प्राथमिक स्वास्थ्य केन्द्रमा चिकित्सक अभाव छ ।

गाउँपालिकाले साउन १ गतेबाट करारका स्वास्थ्यकर्मीलाई काममा नफर्किने निर्देशन दिएसँगै करारमा रहेका दुई जना चिकित्सक घर फर्किएका छन् ।

स्वास्थ्य केन्द्र पुगेर स्वास्थ्य सेवा नलिइ फर्किनेमा ममता एक्ली स्वास्थ्य सेवाग्राही नभएको प्राथामिक स्वास्थ्य केन्द्रका डाक्टर अर्जुन राईले बताउनु भयो ।

गाउँपालिकाले महिना बितिसक्दा समेत स्वास्थ्यकर्मीको व्यवस्थापन गर्न नसक्दा  चिकित्सकको अभाव भएको डाक्टर राईले बताउनु भयो ।

सरकारी स्वास्थ्य संस्थामा सेवाग्राहीले सेवा नपाएको खण्डमा नेपालको संविधान २०७२ को भाग ३ को धारा ३५ र जन स्वास्थ्य सेवा ऐन २०७५ को परिच्छेद २ को ३ स्वास्थ्य सेवा प्रवाह गर्ने कानुन र व्यवस्थामा आकर्षित हुन्छ ।

जनस्वास्थ्य सेवा ऐन २०७५ को परिच्छेद २ को दफा ३ मा स्वास्थ्य सेवाको पहुँच तथा सुनिश्चितता उल्लेख गरिएको छ ।

सोही दफाको उपदफा १ मा प्रत्येक नागरिकलाई गुणस्तरीय स्वास्थ्य सेवा सहज र सर्वसुलभ रूपमा प्राप्त गर्ने अधिकार अधिकार किटान गरिएको छ ।

उपचारको लागि स्वास्थ्य केन्द्र पुगेपनि उपचार नहुने भएपछि उपचारका लागि काठमाडौँ जानका लागि सवारी भाडादर ३ हजार रुपियाँ र हवाई भाडादर ७ हजार रुपियाँ खर्च जानैकै लागि लाग्ने नेचासल्यान गाउँपालिका–५ नेचाकी ६० वर्षीया अनिता बास्तोलाले बताउनु भयो ।

एमबीबीएस  डाक्टरसहित १८ जनाको दरबन्दी रहेकोमा स्वास्थ्यकेन्द्रमा हाल तीन जना मात्रै कार्यरत छन् ।

एक जना एमबीबीएस डाक्टर अर्जुन राई, अनमी सरिता बास्तोला र एक जना कार्यालय सहयोगी कार्यरत छन् ।

एक वर्षमा २ हजार ३ सय ५५ जनालाई सेवा प्रवाह गरेको स्वास्थ्य केन्द्रमा चिकित्सक अभावकै कारण विरामीलाई फकाउनुपर्ने बाध्यता रहेको जिल्ला स्वास्थ्य कार्यालयका प्रमुख नारदमणि पोखरेलले बताउनु भयो ।

स्वास्थ्यकर्मी पदपूर्तिका लागि साउन १८ गतेको कार्यपालिका बैठकले निर्णय गरी  सोही दिन सूचना जारी गरेको गाउँपालिका उपाध्यक्ष बिना राईले बताउनु भयो ।

भदौको १५ गतेभित्र स्वास्थ्य केन्द्रमा स्वास्थ्यकर्मी नियुक्त गरिसक्ने उपाध्यक्ष राईको भनाइ छ ।


अञ्जु कार्की