समाचारहरू

पुतलीबजार नगरपालिका–३, कुमालगाउँस्थित स्याङ्जा अस्पताल स्याङ्जामा स्वास्थ्य चिकित्सकको दरबन्दी कम हुँदा सेवाग्राहीले सास्ती पाएका छन् ।

बिहान ११ बजे नै टिकट काटेकी पुतलीबजार नपा–२ की सविना मरासिनीले डाक्टरको पालो कुर्दाकुर्दा ३ बजेपनि जँचाउने पालो नआएको बताउनुभयो ।

आँधिखोला गाउँपालिका–४ की राममाया दर्जी औषधि लिने लाइनमा करिब १ घण्टा बिताउँदा पनि औषधि हात नलागेकोमा निरास भएको बताउनु हुन्छ ।

दाँतको उपचारका लागि अस्पताल पुग्नुभएकी माया भुजेल दुई दिनसम्म उपचारको पालो नपाएर फर्कनु परेको बताउनु हुन्छ ।

जिल्लाकै ठूलो मानिने सरकारी अस्पतालमा बहिरङ्ग सेवा पाउन दुई/तीन दिन धाउनु पर्ने भएकाले अस्पतालप्रतिको दृष्टिकोण बदलिएको पुतलीबजार नपा–२ का अमृत नेपाली सुनाउनु हुन्छ ।

यति मात्र हैन सेवा छिटो छरितो नहुँदा बिरामी नीजि अस्पताल समेत जानुपरेको उहाँको गुनासो छ ।

अस्पतालका मेडिकल सुपरिटेण्डेण्ट डा. रमेशप्रसाद आचार्यका अनुसार केन्द्रीय सरकार र प्रदेश सरकारबाट तीन जना चिकित्सक, तीन जना एचए, १२ जना नर्स, तीन जना रेडियोग्राफर, दुई जना अहेब, दुई ल्याव टेक्निसियन जम्मा गरी जम्मा २५ जना रहेको छ ।

चिकित्सक छात्रवृत्ति अन्तर्गत ६ जना चिकित्सक यहाँ सेवा प्रदानको लागि आउनुहुन्छ । जसमध्ये दुई जना अध्ययन विदामा रहनुभएकाले थप समस्या भएको उहाँ तर्क छ । दैनिक जसो बहिरङ्ग सेवाको लागि मात्र १ सय ५० जनाले टिकट काट्नुभएको बताउनु हुन्छ ।

अस्पतालको पछिल्लो समयमा बढ्दै गएको चाप लाई छिटोछरितो सेवा प्रदान गर्नको लागि दिनहुँ ६ जना डाक्टरले अनिवार्य बहिरङ्ग विभागबाट मात्र सेवा दिनुपर्ने हुन्छ । सोही बमोजिम अन्य प्राविधिक स्वास्थ्यकर्मीको समेत दरबन्दी थाप गर्नु पर्दछ ।

अस्पतालको दैनिक प्रशासनदेखि बिरामी जाँच गर्ने समेत यसै दरबन्दीबाट हुने भएकोले सेवाग्राहीलाई छिटोछरितो सेवा प्रदान गर्न कठिन भइरहेको उहाँ बताउनु हुन्छ ।

आफूले प्रशासनिक फाँट हेर्नुपर्ने, एक जना डाक्टरले इमरजेन्सी वार्डमा बिरामी हेर्नुपर्ने, एक जनाले भिडियो एक्स–रे, एक जनाले डायलसिस र एक जना डाक्टरले अप्रेशन तथा डेलिभरी फाँटमा काम गर्नुपर्ने भएकाले बहिरङ्ग विभागका बिरामी जाँचमा ढिलाइ भएको डाक्टर आचार्यले बताउनु भयो ।

अस्पतालमा पहिला २५ शैयाबाट मात्र सेवा प्रदान हुने गरेकामा अहिले ५२ शैयामा बिरामी राखेर सेवा प्रदान गर्ने गरिएको पनि उहाँले बताउनु भयो ।

राधाकृष्ण शर्मा