स्वास्थ्यकर्मीको आन्दोलनले खोप अभियान प्रभावित

 

कैलाली जिल्लाभरी फागुन २१ र २२ गते जापनिज इन्सेफ्लाइटिस जेई तथा पोलियो खोप खुवाइने अभियान स्वास्थ्यकर्मीहरूको आन्दोलनका कारण स्थगित गरिएको जिल्ला जनस्वास्थ्य कार्यालय कैलालीले जनाएको छ । यसअघि पनि फागुन ७ र ८ गतेका लागि पूर्वनिर्धारित खोप अभियान कार्यक्रम स्वास्थ्यकर्मीहरूको आन्दोलनकै कारण प्रभावित भएको थियो ।

जिम्मेवारी अनुसार सेवा सुविधा दिइनु पर्नेलगायतका माग राखेर स्वास्थ्यकर्मी फागनु ४ गतेदेखि आन्दोलनमा उत्रेका कारण पोलियो खोप अभियानका लागि आवश्यक सामग्री खोप केन्द्रमा पठाउन नसकिएकोले कार्यक्रम प्रभावित भएको जिल्ला जनस्वास्थ्य कार्यालयका खोप सुपरभाइजर प्रदिप जोशीले बताए ।

कार्यक्रम अन्तर्गत कैलालीमा पाँच वर्षमुनिका १ लाख १६ हजार ८ सय ४६ जना बालबालिकालाई जेई तथा पोलियो खोप कार्यक्रममा समावेश गर्ने लक्ष्य राखिएको थियो । सो अभियानका लागि ५ सय ८० खोप केन्द्रमा १ हजार १ सय ६० स्वयम्सेवकहरू खटाइने भनेपनि स्वास्थ्यकर्मीहरूको आन्दोलनका कारण अभियानमा असर पर्न सक्ने भन्दै अर्को सूचना जारी नभएसम्मको लागि पोलियो खोप कार्यक्रम स्थागित गरिएको वरिष्ठ जिल्ला जनस्वास्थ्य प्रशासक टङ्कप्रसाद चापागाईले बताए ।

नेपाललाई २०१० मा नै पोलियो उन्मूलन घोषणा गरिएको भएपनि भारतमा उन्मूलन नभएकोले रोगको सङ्क्रमण तराईका जिल्लामा फैलन सक्ने भन्दै स्वास्थ्य मन्त्रालयले कैलालीसहित तराईका १२ र काठमाण्डौँ उपत्यकाका तीन जिल्ला गरी १५ जिल्लामा सो कार्यक्रम सञ्चालन गर्न लागेको स्वास्थ्य मन्त्रालयले जनाएको थियो ।


रविना चौधरी