समाचारहरू

दरवन्दी अनुसार स्वास्थ्यककर्मी नहुँदा जिल्लाका सबै स्वास्थ्य संस्थाहरूमा स्वास्थ्यसेवा प्रवाहमा समस्या देखिएको छ । रिक्त दरबन्दीमा पदपूर्ति नहुँदा अधिकांश स्वास्थ्य संस्थाहरूमा यस्तो समस्या देखिएको हो ।

जिल्लामा एउटा अस्पताल, तीन ओटा प्राथमिक स्वास्थ्य केन्द्र र ५३ गाविस र दुई नगरपालिकाका साविककै १० गाविस गरि ६३ ओटै गाविसमा स्वास्थ्य चौकी रहेका छन् । स्वास्थ्य संस्थाहरूमा दरबन्दी अनुसार स्वास्थ्यकर्मी र कर्मचारी नहुँदा दुरदराजका नागरिक स्वास्थ्य सेवा पाउने संवैधानिक अधिकारबाट वञ्चित हुँदै आएका छन् ।

जिल्ला स्वास्थ्य कार्यालय भोजपुरमा जनस्वास्थ्य अधिकृत र चिकित्सकसहित १ सय ४० भन्दा बढी स्वास्थ्यकर्मीको दरबन्दी रिक्त रहेको छ । जिल्ला अस्पतालमा चिकित्सकसहित ११ दरबन्दी रिक्त रहेका छन् ।

त्यस्तै जिल्लाभर रहेका प्राथमिक स्वास्थ्य केन्द्रमा ११ दरबन्दी रिक्त छन् भने स्वास्थ्य चौकीमा कार्यरत स्वास्थ्यकर्मी तथा कर्मचारी १ सय ५० भन्दा बढी रिक्त रहेको जिल्ला स्वास्थ्य कार्यालयले जनाएको छ । जिल्लाको कूल ३ सय ८७ दरबन्दीमध्ये १ सय ७० भन्दा बढी दरबन्दी रिक्त रहेको जिल्ला स्वास्थ्य कार्यालय भोजपुरका प्रमुख डाक्टर नवलकिशोर झाले जानकारी दिए ।

दरबन्दी रिक्त रहेका स्वास्थ्यकर्मीमध्ये हेल्थ असिष्टेण्ट ६६ जना, अनमी ७७ जना, अहेव ५० जना, स्टाफ नर्स चार जना र ल्याब असिस्टेन्ट तीन जनाको पद रिक्त रहेको उल्लेख गरिएको छ ।

भोजपुर सदरमुकाममा रहेको जिल्ला अस्पताल ५० शैयाको निर्माणाधीन अवस्थामा छ । भूकम्पबाट भवन क्षतिग्रस्त भएपछि हाल अस्थायी रुपमा १६ शैयामा सञ्चालन हुँदै आएको छ ।

बिरामीको चापले गर्दा बेड सङ्ख्या पर्याप्त नहुँदा भुइँमा राखेर उपचार गरिरहनु परेको जिल्ला स्वास्थ्य कार्यालय भोजपुरका प्रमुख डाक्टर नवलकिशोर झाले बताए ।

स्वास्थ्य विभाग र क्षेत्रले जिल्लाको रायविना सरुवा गरेको कारण समस्या आएको जिल्ला स्वास्थ्य कार्यालयका प्रमुख डाक्टर झाले बताए । सरुवा भएपनि त्यस ठाउँमा तत्काल पठाए समस्याको समाधान हुने उनको तर्क छ ।

किरण राई