समाचारहरू

साइपाल गाउँपालिका–५ न्युनामा स्वास्थ्यचौकी नभएका कारण यस वाडाका स्थानीय स्वास्थ्य चेकजाँचबाट वञ्चित हुँदै आएका छन् । जसका कारण उनीहरूले जटिल स्वास्थ्य समस्या खेप्नु परेको छ ।

स्थानीयलाई काँडा स्वास्थ्यचौकी पुग्न तीन/चार घण्टाभन्दा बढी समय लाग्ने भएका कारण यस वाडाका बिमारीहरू स्वास्थ्य संस्थामा नगएर जडीबुटीकै भरमा उपचार गराउने गरेका कारण समस्यामा पर्दै आएका छन् ।

नजिक स्वास्थ्य संस्था नहुँदा वाध्य भएर आफूले गाउँघरमा पाइने जडीबुटीबाटै औँलाको उपचार गराउँदै आएको भए पनी सन्चो नभएका कारण औँलामा सङ्क्रमण भएको साइपाल गाउँपालिका–५ न्युनाकी दुधकलादेवी बोहराले गुनासो पोखिन् ।

बोहराले भनिन्–‘जडीबुटीले हातमा लागेको चोट निको नभएपछि एक महिनापछि मात्रै बाध्य भएर म चार घण्टा हिँडेर स्वास्थ्य चौकीमा उपचार गर्न आए । तर, ढिलो भएका कारण मेरो औँलामा सङ्क्रमण भएकाले उपचार गर्न समस्या भएको स्वास्थ्यकर्मीले बताएका छन् । स्वस्थ्यचौकी टाढा भएका कारण जटिल स्वास्थ्य समस्या भएकाहरू समेत जडिबुटी गरेर नै चित्त बुझाएर घरमै बस्न बाध्य छन् ।’

वाडा नम्बर–५ न्युनामा स्वास्थ्यचौकी नभएको र नजिकको स्वास्थ्य संस्थामा पुग्न तीन/चार घण्टा जङ्गलको बाटो हिँड्नु पर्ने भएकोले स्थानीयले सास्ती खेप्नुपरेको महिला स्वास्थ्य स्वयम्सेविका दीपा बोहराले बताइन् ।

साइपाल गाउँपालिकाका अध्यक्ष राजेन्द्र धामीले साइपाल गाउँपालिका–५ न्युनाका स्थानीयहरूका लागि स्वास्थ्यचौकी टाढा पर्ने भएकोले स्वास्थ्य एकाई गाउँमै स्थापना गरी एक जना अहेव र अनमीको दरवन्दी सहित स्वास्थ्य सेवा उपलब्ध गराउने प्रतिवद्धता जोहर गरेका छन् ।

रमेश केसी