समाचारहरू

दाङ जिल्ला सौडियार गाविस-२ घर भई जिल्ला ट्राफिक कार्यालय प्यूठानमा कार्यरत ३३ वर्षीय प्रहरी हवल्दार त्रिचन्द्रबहादुर डिसीलाई 'स्यालुट' नगरेको आरोपमा जिल्ला प्रहरी कार्यालय प्यूठानका प्रमुख डिएसपी रञ्जितसिंह राठौरले माघ २५ गते कुटपिट गरेको पीडितले आरोप लगाएका छन् ।

स्यालुट नगरेको आरोपमा डिएसपीले सोही दिन साँझ आफूलाई इलाका प्रहरी कार्यालय बिजुवारमा उपस्थित गर्राई अमानवीय व्यवहार गरी कुटपिट गरेको पीडित प्रहरी हवल्दारले बताए । डिएसपीको कुटपिटबाट उनको बायाँ हात सुनिएको छ । पीडितको जिल्ला अस्पतालमा उपचार भयो ।

प्यूठान नपा-११ स्थित चेरनेटा सडक खण्डमा ट्राफिक चेकजाँचका क्रममा आफूले हाकिमलाई नदेखेको भन्दै गल्ती नगर्दा नियम बाहिर गई सजाय पाएको पीडितले गुनासो गरे ।

घटनाका विषयमा प्रमुख जिल्ला अधिकारी जनकराज पन्तले प्रहरी हवल्दारले पहिलेदेखि गल्ती गरेको उजुरी आफूसँग आएको र उसलाई सोही अनुसार प्रहरी कार्यालयमा बोलाई सङ्गठनको नियम अनुसार सामान्य नसियत दिने काम भएको डिएसपीले आफूलाई जानकारी गराएको बताए । घटनाका विषयमा सम्पर्क गर्न खोज्दा डिएसपीको फोन उठेन ।

घटनाका सम्बन्धमा अञ्चल प्रहरी कार्यालय तुल्सीपुरको टोली माघ २६ गते जिल्लामा आई पीडित तथा अन्य सम्बन्धित पक्षसँग घटनाका बारेमा सोधपुछ गरेको पीडितले बताए ।

रविन्द्र पाण्डे