समाचारहरू

स्याङ्जामा युरिया मलको माग, आपुर्तिभन्दा निकै बढी हुँदा उत्पादनमा कमी हुने किसानले गुनासो गरेका छन् ।

रासायनिक मल आपुर्तिको जिम्मा लिएको कृषि सामाग्री कम्पनी लिमिटेडले माग अनुसार मल उपलब्ध गराउन नसक्दा किसानले यस्तो गुनासो गरेका हुन् ।

स्याङ्जामा रासायनिक मलको वार्षिक माग करिव १६ सय टन भएको कृषि सामग्री कम्पनी लि.का कार्यालय प्रमुख विशेश्वर गीरीले बताउनु भयो ।

उहाँका अनुसार हाल १ सय २५ टन मल आपुर्तिका लागि गण्डकी प्रदेश कृषि मन्त्रालयले अनुमति दिएको छ । सो बमोजिम ७० टन मल मात्र प्राप्त भएको छ भने बाँकी मल आउन अझै केही समय लाग्ने उहाँले बताउनु भयो ।

स्याङ्जाका ११ ओटा स्थानीय तहमध्ये वालिङ् नगरपालिका, गल्याङ् नगरपालिका र कालिगण्डकी गाउँपालिकामा मल आपुर्ति गर्न नसकिएको गीरीको भनाइ छ ।

धानबालीमा रासायनिक मल प्रयोग गर्न मल विक्री गर्ने डिपोहरुमा किसानको भिड लाग्ने गरेको भएपनि मल पाउन नसकिएको पुतलीबजार नगरपालिका-८ का इन्द्रप्रसाद सुवेदीले गुनासो गर्नु भयो ।

कृषि ज्ञान केन्द्र स्याङ्जाका कृषि प्रसार अधिकृत ईश्वरीप्रसाद अर्यालका अनुसार स्याङ्जामा कुल १६ हजार हेक्टर जमीनमा धान खेती गरिएको छ ।

जसबाट करिव ६१ हजार मेट्रीक टन धान उत्पादन हुनुपर्छ । त्यति धान फलाउनका लागि किसानले बालीमा प्रशस्त मल, सिंचाई र रेखदेख गर्नु पर्दछ ।

यदि कुनै कुरामा कमी आएमा धानबालीले सोचेजस्तो उत्पादन दिन सक्दैन । जसका लागि रोप्ने बेलामा प्रति रोपनि ११ केजी युरीया, ६.५ केजी डिएपी र ३.३ केजी पोटासियमको मात्रा मिलाई प्रयोग गर्नु उपर्युक्त हुने कृषकहरूको भनाइ छ ।

रासायनिक मलको परनिर्भता घटाउन व्यापक कार्यक्रम ल्याउनु पर्ने अधिकृत अर्यालको भनाइ छ । त्यसमा स्याङ्जा ज्ञान केन्द्रले केही कार्यक्रम बनाउने क्रममा रहेको पनि उहाँले जानकारी दिनु भयो  ।

रासायनिक मलको सट्टामा पशु मलमुत्र, झोल मल, पिना, प्राङ्गारिक मल बनाएर धानबालीमा प्रयोग गर्न सकिने उहाँको भनाइ रहेको छ ।

रासायनिक मलको आपुर्ति बढाउन पहल भइरहेको स्याङ्जाका सहायक प्रमुख जिल्ला अधिकारी नमिता रेग्मीले जानकारी दिनु भयो ।

उहाँका अनुसार हाल मल आपुर्ति गर्ने ठेकेदार कम्पनीको म्याद सकिएको हुँदा पनि आपुर्तिमा ढिला भएको हो ।

 

राधाकृष्ण शर्मा