समाचारहरू

स्थानीय निर्वाचनमा युवा नेतृत्व विषयक अन्तरसम्वाद कार्यक्रममा स्थानीय निर्वाचनमा युवाको सहभागिता सुनिश्चित गर्नु पर्नेमा सहभागीहरूले जोड दिएका छन् ।

वैशाख ९ गते काठमाडौँमा आयोजित उक्त कार्यक्रममा अनौपचारिक क्षेत्र सेवा केन्द्र (इन्सेक) का अध्यक्ष सुबोधराज प्याकुरेलले युवाको जनसङ्ख्या धेरै रहेकोले युवा सहभागितालाई समेट्नु पर्नेमा जोड दिएका हुन् । स्थानीय तहको निर्वाचनमा मतपत्र बदर हुन सक्ने सम्भावना धेरै रहेकोले मतदाता शिक्षा अभियानलाई प्रभावकारी रूपमा सञ्चालन गर्नु पर्ने उल्लेख गर्दै स्वच्छ निर्वाचनका लागि युवा जमातलाई लाग्न उनले सुझाव दिए ।

इन्सेक अध्यक्ष प्याकुरेलले निर्वाचनमा डिजिटल प्रविधिको भरपुर प्रयोग गर्नु पर्नेमा जोड दिँदै मतदाता शिक्षा अभियानका लागि सञ्चार माध्यममार्फत सबै कुरा समेटेर कम्तिमा एक मिनेटको जिङ्गल बनाएर दैनिक रूपमा गाउँस्तरसम्म सूचना दिन युवाहरू जिम्मेवार भएर लाग्नु पर्ने बताए ।

नेकपा एमाले सांसद गोकुल घर्तीमगरले देश निर्माणमा युवाको महत्वपूर्ण भूमिका रहेकोले स्थानीय निर्वाचनमा युवाको सहभागिता अनिवार्य रहेको बताए । युवा सहभागिताका लागि राजनीतिक पहल आवश्यक रहेको उल्लेख गर्दै त्यसका लागि युवाले पनि योग्यता र क्षमता बढाउनु पर्नेमा उनले जोड दिए ।

एकीकृत माओवादी केन्द्रका स्थायी कमिटी सदस्य लेखनाथ न्यौपानेले विषय विज्ञताको राजनीतिमा अभाव रहेकोले योग्य र क्षमतावान युवा राजनीतिमा प्रवेश गर्दा सहभागिता स्वतः हुने बताए ।

नेविसंघका अध्यक्ष नैनसिंह महरले योजना अनुसार स्थानीय निर्वाचनमा युवाको सहभागिता हुन नसकेको बताए । राजनीतिक संस्कार र सोच सकारात्मक बनाउन सके देशको विकास सम्भव हुने उनले बताए ।

अधिकारकर्मी प्रदिप पोखरेलले निर्वाचनमा आर्थिक अपादर्शिता भएकोले पारदर्शी बनाउन युवाले नेतृत्व लिनु पर्ने बताए ।

इन्सेक क्षेत्रीय कार्यालय काठमाडौँ