स्थानीय तह सदस्य निर्वाचन ०७९– प्रदेश १ मा प्रहरीको गोली प्रहारबाट एकको मृत्यु, इन्सेकद्वारा निर्वाचन पर्यवेक्षण

  ०७९ वैशाख ३० गते

उदयपुर प्रतिनिधि तथा इन्सेक पर्यवेक्षक सुजाता ढुङ्गानाका अनुसार प्रहरीको गोली प्रहारबाट एक जनाको मृत्यु भएको छ । कटारी नगरपालिका–१० स्थित जनता कालिका मावि सोरुङ्ग मतदान स्थलमा मतदान समापन पश्चात मतपेटिका सिल बन्दी गर्ने क्रममा नेकपा माओवादी केन्द्रका अन्दाजी ५०,६० जना कार्यक्रताहरूले मतपेटिका लुट्ने प्रयास गरे प्रहरीले साँझ ५ बजेर २० मिनेटमा चलाएको गोली प्रहारबाट कटारी नगरपालिका–१० का १९ वर्षीय नविन कटुवालको घटनास्थलमै मृत्यु भएको प्रहरीले जनाएको छ । मतपेटिका लुट्ने प्रयास भएपछि मतदान केन्द्र तनावग्रस्त भएको थियो । स्थितिलाई नियन्त्रणमा लिनका लागि सो मतदान स्थल सुरक्षार्थ खटिएको नेपाल प्रहरीको असइको कमाण्ड चार जना प्रहरी र आठ जना म्यादी प्रहरीको टोली गरी १२ जनाको टोलीले राईफलबाट चार राउण्ड र थ्रि नट थ्री राईफलबाट चार राउण्ड गरी आठ राउण्ड गोली फायर नविन कटुवालको घटनास्थलमै मृत्यु भएको प्रहरीले पुष्टि गरेको छ । घटनामा सोही ठाँउका शम्भु श्रेष्ठका १४ वर्षीय छोरा मन श्रेष्ठ घाइते भएका छन् । घरमा बसिरहेको अवस्थामा खुट्टामा गोली लागि बालक घाइते भएका छन् । माओवादी केन्द्रका कार्यकर्ताहरूले गरेको ढुङ्गामुडाबाट प्रहरी जवान विष्णु तामाङ्गको टाउकोमा चोट लागेको प्रहरीले जनाएको छ । चार ओटा गाउँपालिका र चार ओटा नगरपालिका गरी आठ ओटा गाउँपालिकाका ७५ वटा वडामा निर्वाचन भएको छ । त्रियुगा नगरपालिका–१२ मा रहेको मतदान केन्द्रमा मतदानका क्रममा पानी परेपछि कर्मचारी ओत लागेको र मतदातालाई लाइनमा अलपत्र पारेको आरोपमा स्थानीयले नाराबाजी गर्दा मतदान रोकिएको छ ।

ताप्लेजुङ प्रतिनिधि तथा इन्सेक पर्यवेक्षक देवराज गुरूङका अनुसार जिल्लामा शान्तिपूर्ण ढङ्गमा मतदान सम्पन्न भएको छ । आठ ओटा गाउँपालिका र एक ओटा नगरपालिका गरी नौ ओटा स्थानीय तहका ६४ ओटा वडामा मतदान विहान ७ बजेबाट सुरू भएर साँझ ५ बजे सम्पन्न भएको छ । फक्त्ताङलुङ गाउँपालिका–६ घुन्सामा मतदाता मलाली जानु परेका कारण ९ बजेबाट मतदान सुरू भएको थियो । १ सय ६६ जना मतदाता रहेका घुन्सामा समयमा नै मतदान सम्पन्न भएको मतदान अधिकृत गङ्गाबहादुर इङ्गनामले बताउनु भयो । सोही गाउँपालिका–७ मा अध्यक्ष र उपाध्यक्ष पदमा मात्र निर्वाचन भएको छ । अन्य पदमा यसअघि नै जनप्रतिनिधि निर्विरोध निर्वाचित भएका छन् । जिल्लामा ६४ प्रतिशत मतदान भएको जिल्ला निर्वाचन अधिकृत दिनेश खनालले बताउनु भएको छ । आठराई त्रिवेणी गाउँपालिका–१ निघुरादिनमा दिउँसो १ बजेदेखि २ बजेसम्म वर्षाका कारण मतदान रोकिए पनि साँझ ५ बजे मतदान सम्पन्न भएको छ । मतपेटिक दुर्गम क्षेत्रबाट हेलिकप्टरमा ल्याउने तयारी गरिएको छ ।  निर्वाचन कार्यालयका अनुसार जिल्लामा ६४ दशमलव ५३ प्रतिशत मत खसेको छ । नौ वटा स्थानीय तहअन्तर्गत रहेका मतदानस्थल र मतदान केन्द्रमा ६४ दशमलव ५३ प्रतिशत मत खसेको हो । जिल्ला निर्वाचन अधिकारी दिनेश खनालका अनुसार पूर्ण रुपमा रुजु गर्न बाँकी छ । जिल्लामा ८९ हजार ६ सय ८० जना मतदाता रहेको कार्यालयको तथ्याङ्क छ । ७३ ओटा मतदानस्थल र १ सय २२ ओटा मतदान केन्द्रमा शान्तिपूर्ण रूपमा मतदान भएको छ ।

फुङलिङ नगरपालिकामा १ हजार ३३ अर्थात ६४ दशमवल १४ प्रतिशत मत खसेको छ । नगरपालिकामा १७ हजार २ सय २ मतदाता थिए । आठराई त्रिवेणी गाउँपालिकामा ६ हजार ७० जना अर्थात ६२ दशमलव ३० प्रतिशतले मतदान गरेका छन् । आठराई त्रिवेणी गाउँपालिकामा मतदाता संख्या ९ हजार ७ सय ४३ थियो । फक्ताङलुङ गाउँपालिकामा ५ हजार ८ सय २६ जना अर्थात ६५ दशवमलव ५३ प्रतिशतले मतदान गरेका छन् । फक्ताङलुङ गाउँपालिकामा ८ हजार ८ सय ९० मतदाता थियो । मिक्वाखोला गाउँपालिकामा ४ हजार ५ सय ४८ जना अर्थात ६५ दशमलव २८ प्रतिशतले मतदान गरेका छन् । मिक्वाखोला गाउँपालिकामा ६ हजार ९ सय ६७ मतदाता थियो । मेरिङ्देन गाउँपालिकामा ६ हजार ८६ जना अर्थात ७० दशमलव ७४ प्रतिशतले मतदान गरेका छन् । मेरिङ्देन गाउँपालिकामा ८ हजार ६ सय ३ मतदाता थियो । मैवाखोला गाउँपालिकामा ५ हजार ७९ अर्थात ६५ दशमलव १४ प्रतिशतले मतदान गरेका छन् । मैवाखोला गाउँपालिकामा ७ हजार ७ सय ९७ मतदाता रहेको थियो । पाथीभरा याङ्वरक गाउँपालिकामा ६ हजार १ सय ६३ अर्थात ६२ प्रतिशतले मतदान गरेका छन् । पाथीभरा याङ्वरक गाउँपालिकामा ९ हजार ९ सय ४१ मतदाता थियो । सिदिङ्मा गाउँपालिकामा ५ हजार ८ सय ९ जना अर्थात ६५ दशमलव ४३ प्रतिशतले मतदान गरेका छन् । सिदिङ्मा गाउँपालिकामा ८ हजार ८ सय ७८ मतदाता थियो । सिरीजंङ्गा गाउँपालिकामा ७ हजार २ सय ५५ जना अर्थात ६२ दशमलव २३ प्रतिशतले मतदान गरेका छन् । सिरीजङ्गा गाउँपालिकामा ११ हजार ६ सय ५९ जना मतदाता संख्या थियो । जिल्लास्थित मतदान केन्द्रबाट सम्बन्धित निर्वाचन अधिकृतको कार्यालयमा मतपेटिका ल्याउन सुरु भएको छ । फक्ताङलुङ गाउँपालिकाको याङ्मा,घुन्सा,ग्याब्ला र ओलाङचुङगोलाको बाहेक बाँकी मतदान केन्द्रको मतपेटिका जेठ १ गते १० बजेभित्रमा संकलन गर्न सकिने अनुमान गरिएको छ । हेलिकप्टरबाट ल्याउने भनिएतापनि खराब मौसम र हेलिकप्टर व्यवस्थापनमा समस्या भएकाले फक्ताङलुङ गाउँपालिकाका चार ठाउँको मतपेटिका जेठ १ गते विहान मान्छेलाई बोकाएर ल्याउने तयारी गरिएको छ ।

सङ्खुवासभा प्रतिनिधि तथा इन्सेक पर्यवेक्षक भविन कार्कीका अनुसार जिल्लामा ६६ प्रतिशत मत खसेको छ । जिल्ला निर्वाचन कार्यालयका अनुसार जिल्लाका आठ स्थानीय तहको मात्र विवरण प्राप्त भएको छ । भोटखोला गाउँपालिका र चैनपुर नगरपालिका बाहेक सबै स्थानीय तहको विवरण आइसकेको छ । आठ स्थानीय तहका ६१ हजार २ सय २७ जनाले मतदान गरेको जिल्ल्ला निर्वाचन कार्यालय संखुवासभाका सूचना अधिकारी लोकेन्द्र राईले बताउनु भयो । जिल्लामा ६० हजार ६ सय ७८ जना पुरूष र ५७ हजार ५३ जना महिला गरी १ लाख १७ हजार ७ सय ३१ जना मतदाता छन् । जिल्ला १० वटै पालिकामा शान्तिपूर्ण रुपमा मतदान  भएको मुख्य निर्वाचन कार्यालय संखुवासभाले जनाएको छ । जिल्लामा १०३ मतदान स्थल र  १६२ मतदान केन्द्र रहेका छन् । संखुवासभामा ४ सय पदका लागि १ हजार ११ जनाले उम्मेदवारी दिएका थिए । १०३ स्थलका १६२ मतदान केन्द्र रहेको यस जिल्लामा निर्वाचन सम्पन्न गर्न सात सय ९९ कर्मचारी खटाइएको थियो । जिल्लाभर ४ सय ९७ नेपाल प्रहरी, ४ सय ९७  म्यादी ८ सय १३, सशस्त्र  ३ सय ४४ र नेपाली सेना दुई सय परिचालन गरिएको छ । जिल्लाका ८ वटा मतदानस्थललाई अति संवेदनशील सूचिमा राखिएकोे छ । सुरक्षा सम्वेदनशिलताका आधारमा स्थानीय तह निर्वाचनका लागि जिल्ला सुरक्षा समिति संखुवासभाले ८ वटा मतदान स्थललाई अति सम्वेदनशिलको सूचीमा राखेको हो । जिल्लाको खाँदबारी नगरपालिका र भोटखोला सबैभन्दा कम मतदाता रहेको छन् । जसअनुसार खाँदबारीको टुँडिखेल मतदान केन्द्रमा सबैभन्दा धेरै मतदाता २२ सय ९२ र भोटखोला गाउँपालिका –२ दुधपोखरी आधारभूत विद्यालय थुदाम सबैभन्दा कम ६९ जना मतदाता रहेका छन् । चैनपुर नगरपालिका ४ मा मतदान केन्द्र नजिकै बम विस्फोट भएको छ । चैनपुर नगरपालिका–४ को बालज्योति आधारभूत विद्यालयभन्दा ४० मिटर टाढा बम विस्फोट भएको इलाका प्रहरी कार्यालय चैनपुरका इन्स्पेक्टर मिलन बस्नेतले बताउनु भयो । उक्त विद्यालयमा रहेको मतदान केन्द्रमा सामान्य विवाद समेत भएको थियो । बम कसले र किन विस्फोट गरायो भन्ने खुल्न नसकेको प्रहरीले जनाएको छ ।

खोटाङ प्रतिनिधि तथा इन्सेक पर्यवेक्षक नारानाथ फुयलका अनुसार जिल्लाका दुई ओटा नगरपालिका र आठ ओटा गाउँपालिकामा शान्तिपूर्ण ढङ्गमा निर्वाचन सम्पन्न भएको छ । दिक्तेल रूपाकोट मझुवागढी नगरपालिका–१५ मा मतदाता परिचयपत्रका विषयमा केही समय विवाद भएपनि विवाद समाधानपछि मतदान सम्पन्न भएको छ । विहान ७ बजेबाट सुरू भएको मतदान दिउँसो पौन तीनदेखि तीन बजेसम्म वर्षाका कारण स्थगित भएपनि साँझ ५ बजे मतदान सम्पन्न भएको मुख्य निर्वाचन अधिकृतको कार्यालयले जनाएको छ । जिल्लाका केही वडामा मतदान स्थगित भएको भनिए पनि आयोगले औपचारिक पुष्टि गरेको छैन ।

सोलुखुम्बु इन्सेक पर्यवेक्षक अञ्जु कार्कीका अनुसार एक ओटा नगरपालिका र आठ ओटा गाउँपालिका गरी नौ ओटा स्थानीय तह रहेको जिल्लाका ५२ ओटै वडामा शान्तिपूर्ण ढङ्गमा निर्वाचन सम्पन्न भएको छ । जिल्लाको दुई ओटा मतदान स्थलमा मतदान कार्य ढिला गरी सुरु भएको थियो । महाकुलुङ गाउँपालिका र सोलुदुधकुण्ड नगरपालिका–१ हेवा  गरी दुई वटा मतदानस्थलमा मतदान कार्य ढिला गरी सुरु भएको हो । जिल्लाका मुख्य निर्वाचन अधिकृत सन्तोष प्रसाद पराजुलीका अनुसार सोलुदुधकुण्ड नगरपालिका १ हेवा स्थित मा रहेको  एक  मतदान स्थलमा चर्किएका मतपेटिका भेटिएका  कारण मतदान सुरु हुन ढिला भएको हो । जिल्लाभर रहेका कुल १ सय २२ मतदान स्थल र १ सय ३४ ओटै मतदान केन्द्र बाटै शान्ति पूर्ण रूपमा मतदान सम्पन्न भएको निर्वाचन अधिकृत सन्तोषप्रसाद पराजुलीले बताउनु भएको छ ।

ओखलढुङ्गा प्रतिनिधि तथा इन्सेक पर्यवेक्षक सरस्वती बानियाका अनुसार चम्पादेवी गाउँपालिका–९,मिश्र भञ्ज्याङ्गमा प्रहरीले नौ राउण्ड हवाइ फायर गरेपछि मतदान प्रभावित भएको छ । नेपाली कांग्रेस र नेकपा एमालेका कार्यकर्ताबीच झडप भएपछि स्थितिलाई नियन्त्रणमा लिन नौ राउण्ड हवाई फायर गरिएको जिल्ला प्रहरी कार्यालयका डिएसपी सुकदेव खनालले जानकारी दिनुभयो । जीवनज्योति आधारभूत विद्यालयमा बिहान ९ बजे कांग्रेस र एमाले कार्यकर्ताबीच लाइन बस्ने विषयमा विवाद भएको थियो । सामान्य विबादले उग्ररुप लिएपछि प्रहरीले सम्झाउन खोज्दा बुथमा लगाएको बार नाघेर मतदान सामग्री भएको ठाउँमा प्रवेश गरेपछि हवाई फायर गर्नु परेको डिएसपी सुकदेव खनालले इन्सेक प्रतिनिधिसँगको फोन सम्पर्कमा बताउनु भयो । सर्वदलीय बैठक पश्चात मतदान पुनः सुचारु भएको छ । जिल्लाको अन्य स्थानीय तहमा शान्तिपूर्ण रूपमा मतदान भइरहेको छ । जिल्लामा अरु मतदान केन्द्रमा निर्वाचन सम्पन्न भएको छ ।

मोरङ प्रतिनिधि तथा इन्सेक पर्यवेक्षक विनोद सुवेदीका अनुसार जिल्लामा शान्तिपूर्ण ढङ्गमा मतदान भएको छ । जिल्लाका ३ सय ओटा मतदानस्थलको ८ सय ओटा मतदान केन्द्रमा शान्तिपूर्ण ढङ्गमा मतदान सकिएको हो । जिल्ला प्रहरी कार्यालयका डिएसपी दीपक श्रेष्ठले जिल्लामा शान्तिपूर्ण वातावरणमा मतदान भइरहेको बताउनु भयो  । ‘ मोरङमा  कहिँकतै समस्या नदेखिएको प्रहरीले जनाएको छ । लेटाङ स्थित महेन्द्र मावि मतदान केन्द्रमा मतदाता नामावलीको विवादले साढे आठ बजेपछि मात्र मतदान सुरू भएको छ । जिल्लामा शान्तिपूर्ण रुपमा मतदान जारी रहे पनि केही मतदान स्थलको व्यवस्थापन कमजोर देखिएको छ । विराटनगर  शनिहाटस्थित विराट महेन्द्र रात्री मावि मतदान स्थल साँघुरो भएका कारण ज्यादा भीड देखिएको छ । उक्त मतदान स्थलमा ४ वटा केन्द्र रहेका छन् । विराटनगर–३ स्थित पूर्वाञ्चल विश्वविद्यालय विज्ञान तथा प्रविधि क्याम्पस (पुसेट) मतदान केन्द्रमा पनि धेरै मतदाता भएका कारण ज्यादा भीड भाड देखिएको थियो । उक्त मतदान स्थलमा करिब ५ किलोमिटर टाढा देखि हिँडेर आउनु पर्ने भएकाले मतदाताहरूलाई समस्या भएको छ । विराटनगर वडा नम्बर ३ को एउटा मात्रै मतदान स्थल भएकाले पुसेट मतदान स्थलमा मतदान केन्द्र व्यवस्थापनमा समस्या देखिएको छ । पुसेट मतदान स्थालमा ११ वटा मतदान केन्द्रहरू  रहेको र त्यहाँ ११ हजार ३२ जना मतदाता रहेको प्रदेश निर्वाचन कार्यालय विराटनगरका प्रमुख लेवन कश्यप अधिकारीले जानकारी दिनुभयो । जिल्लामा ७ लाख १५ हजार २ सय २३ जना मतदाता छन् । जसमा ३ लाख ५१ हजार ७ सय ६९ जना महिला, ३ लाख ६३ हजार ४ सय ४८ जना पुरूष र अन्य ६ जना मतदाता छन् । निर्वाचन आयोगका अनुसार जिल्लाका १७ ओटा स्थानीय तहमध्ये विराटनगर महानगरपालिकामा सबैभन्दा बढी १ लाख ३३ हजार १ सय ४२ जना मतदाता छन् । रतुवामाई नगरपालिका शान्तिपूर्ण ढङ्गमा मतदान भइरहेको छ । रतुवामाई–८ सरस्वती मावि केन्द्र क मा सात बजेबाट मतदान सुरू भएको छ । पानी परेका कारण मतदानका लागि बनाइएका संरचना प्रयोगविहीन भएका छन् ।

 इन्सेक सुनसरी प्रतिनिधि तथा इन्सेक पर्यवेक्षक जयकृष्ण यादवका अनुसार जिल्लाका दुई ओटा उपमहानगरपालिका, चार ओटा नगरपालिका र ६ ओटा गाउँपालिकामा मतदान सम्पन्न भएको छ । जिल्लाका १ सय २४ ओटा वडामा छिटपुट रुपमा समस्या देखिएपनि शान्ति पूर्ण ढङ्गमा निर्वाचन सम्पन्न भएको छ । बराहक्षेत्र नगरपालिका– १० मा नेकपा एमालेका तर्फबाट मेयरको उम्मेदवार निलम खनालको गाडीमा ढुंगा प्रहार भएको छ । भगवती अधारभुत विद्यालय बकुलाचाप मतदान केन्द्रमा पुगेका बेला खनालको गाडीमा ढुंगा प्रहार भएको हो । बुथभित्र छिरेको भन्दै नेपाली कांग्रेसका कार्यकर्ताहरूले खनालको गाडीमा ढुंगा प्रहार गरेका हुन् । कांग्रेस कार्यकर्ताले विरोध गरेपछि उहाँ बाहिरिनुभएको थियो । बराहक्षेत्र नगरपालिका– ६ मा मतदान केन्द्र अवलोक गर्न पुग्नुभएका नेपाली काग्रेंसका केन्द्रिय सदस्य तथा संचार तथा सूचना प्रविधि मन्त्री ज्ञानेन्द्र बहादुर कार्की विरुद्ध नेकपा एमालेका कार्यकर्ताहरु र केही स्थानीयले नाराबाजी गरेका छन् । बराहक्षेत्र नगरपालिका–६ को चक्रघट्टीमा मतदान केन्द्रमा पुगेका बेला कार्की विरुद्ध एमसीसी चाहिदैन्, देश बेच्न पाईदैन, मन्त्रीको कार्यशैली मुर्दाबादको नारा लगाएका थिए । इनरुवा नगरपालिका–१० मा रहेको श्री आधारभुत विद्यालय मतदान केन्द्रको इन्सेकले विहान ६ देखि साझ ६ बजेसम्म पूर्ण अनुगमन तथा अवलोकन गरेको छ । मतदान सुरु हुनुभन्दा अगडि देखिको प्रकृया र मतदान सकेपछिको बाकस सिल र ढुवानीसम्मको अनुगमन तथा अवलोकन गरेको हो ।

धनकुटा प्रतिनिधि तथा इन्सेक पर्यवेक्षक ईश्वर थापाका अनुसार जिल्लाका तीन ओटा नगरपालिका, चार ओटा गाउँपालिकाका ६० ओटा वडामा मतदान सम्पन्न भएको छ । मतदान प्रक्रियाको विषयमा लोकतान्त्रिक गठवन्धन र नेकपा एमालेका प्रतिनिधिविच विवाद हुँदा सहिदभूमि गाउँपालिका–६ स्थित ठाकुरदेवी मावि र ६ नं. वडा कार्यालय मतदान स्थलका तीन ओटै केन्द्रको मतदान प्रक्रिया स्थगित भएको छ । मतदान प्रक्रियाको विषयमा दुवै पक्षवीच भएको विवादले केहि समयको लागि मतदान कार्य स्थगित गरिएको मतदान केन्द्र–क का मतदान अधिकृत गणेश एडीले बताउनु भयो । मतदान प्रक्रिया स्थगित हुनुभन्दा अघिसम्म तीन वटै केन्द्रमा २० प्रतिशत भोट खसेको छ । एमालेका वडाअध्यक्ष पदका उम्मेदवार हेमकुमार राईले हातपात गरेपछि गठबन्धनका रामप्रसाद राई र गणेश राईलाई हातपात गरेपछि विवाद भएको बताइएको छ । मतदानस्थलमा अशक्त मानिसको मत एक जनाले मात्र हाल्ने भनिएता पनि एक जनाले ४ जना अशक्तको मत लगाएपछि विवाद भएको हो । जिल्ला निर्वाचन अधिकारी जयराम श्रेष्ठले पनि अशक्तको मत हाल्ने क्रममा विवाद भएको बताउनु भयो । धनकुटाका डिएसपी चिरञ्जीबी दाहालले केही विवाद आएर छलफलपछि निर्वाचन आयोगले अर्को निर्णय नगरेसम्म मतदान रोकिएको जानकारी दिनु भएको छ ।

झापा प्रतिनिधि तथा इन्सेक पर्यवेक्षक नरेश खातीका अनुसार  कमल गाउँपालिका–६ मा पाणिनी माविको मतदान केन्द्र ‘ग’ मा खटिएका मतदान अधिकृत शैलेन्द्र कर्ण कारबाहीमा परेका हुन् । उनलाई जिल्ला निर्वाचन कार्यालयले कारबाही स्वरुप फिर्ता बोलाएको छ ।  कर्णले निर्वाचनका समयमा  एक जना व्यक्तिलाई ८८ वटा मतदाता परिचय पत्र उपलब्ध गराएका थिए । सम्बन्धित व्यक्तिले लिन आउनुपर्ने मतदाता परिचय पत्र कर्णले अरुलाई नै वितरण गर्न भन्दै उपलब्ध गराएपछि उनलाई कारबाही स्वरुप फिर्ता बोलाएको प्रमुख निर्वाचन अधिकृत तुलसी नेपालले बताउनु भयो । झापा गाउँपालिका ६ का सहायक मतदान अधिकृत सुरेन्द्र बस्नेतले मादकपदार्थ सेवन गरी मतदानस्थलमा गएको आरोपमा कारबाही गरेको छ । झापा गाउँपालिका– ६ सरणामतिस्थित जनता मावि मतदान केन्द्र ‘ग’ का सहायक अधिकृत बस्नेतले मादक पदार्थ सेवन गरेर आएको मतदाताको गुनासो पछि उनलाई मतदानस्थलबाट हटाइएको छ । झापामा ६६ देखि ६७ प्रतिशत मत खसेको अनुमान गरिएको छ । १५ ओटा स्थानीय तहका ७ सय ५५ ओटा मतदान केन्द्रमा शान्तिपूर्ण ढङ्गमा मतदान सम्पन्न भएको छ । कचनकवल  गाउँपालिका–६ लक्ष्मी माविमा वर्षाको कारण मतदान स्थानमा पानी जमेपछि स्कुल भित्र मतपेटिका राखेर मतदान सम्पन्न गरिएको छ ।

photo 20220513 sangkhuwasabha


इन्सेक प्रदेश १, कार्यालय विराटनगर