समाचारहरू

स्थानीय तह उपनिर्वाचन ०८१ मा कोशी प्रदेशका २१ ओटा मतदानस्थलमा ४९ ओटा मतदान केन्द्र रहने र २ सय ९४ जना कर्मचारी खटाइने प्रदेश निर्वाचन कार्यालय, विराटनगरले जनाएको छ ।

एक गाउँपालिका अध्यक्ष र सात जना वडाध्यक्ष पदका लागि आगामी मङ्सिर १६ गते हुने स्थानीय तह उपनिर्वाचनमा २१ हजार ५ सय ८४ जना पुरुष र २१ हजार ४ सय ५७ जना महिला गरी ४३ हजार ११ जना मतदाताले मतदान गर्ने प्रदेश निर्वाचन कार्यालय, विराटनगरका प्रमुख चोलाराज दङ्गालले बताउनु भयो ।

कोशी प्रदेशको मोरङको ग्रामथान गाउँपालिकामा गाउँपालिका अध्यक्ष पदका लागि, ताप्लेजुङको सिरिजङ्घा गाउँपालिका-३ मा वडाध्यक्ष पदका लागि, झापाको कन्काई नगरपालिका-६ मा वडाध्यक्ष पदका लागि, तेहृथुमको लालीगुराँस नगरपालिका-८ मा वडाध्यक्ष पदका लागि, सुनसरीको गढी गाउँपालिका-६ मा वडाध्यक्ष पदका लागि, ओखलढुङ्गाको मोलुङ गाउँपालिका-५ मा वडाध्यक्ष पदका लागि र उदयपुरको त्रियुगा नगरपालिका-१२ र बेलका नगरपालिका-९ मा वडाध्यक्ष पदका लागि आगामी मङ्सिर १६ गते स्थानीय तह उपनिर्वाचन हुँदैछ ।

उपनिर्वाचनका लागि निर्वाचन आयोगले ०८१ मङ्सिर २ गते मनोनयन दर्तासँगै मङ्सिर ५ गते उम्मेदवारको अन्तिम नामावली प्रकाशन गरिसकेको छ ।

मोरङ प्रतिनिधि विनोद सुवेदीका अनुसार ग्रामथान गाउँपालिकामा गाउँपालिका अध्यक्ष पदका लागि हुने निर्वाचनका लागि २८ हजार ७ सय मतपत्र निर्वाचन आयोगले पठाएको छ । ग्रामथान गाउँपालिकामा १३ हजार ३ जना पुरूष र १३ हजार ४१ जना महिला गरी २६ हजार ४४ जना मतदाता रहेको जिल्ला निर्वाचन कार्यालयले जनाएको छ । मङ्सिर १६ गते हुने निर्वाचनका लागि ग्रामथान गाउँपालिकामा १२ ओटा मतदानस्थलमा २९ ओटा मतदान केन्द्र तोकिएको छ । निर्वाचनका लागि १ सय ७४ जना कर्मचारी खटाइने तयारी गरिएको छ ।

ताप्लेजुङ प्रतिनिधि एलिना दियालीका अनुसार फुङलिङ गाउँपालिका-३ सिकैँचामा वडाध्यक्ष पदका लागि हुने निर्वाचनका लागि १ हजार ६ सय ५ थान मतपत्र निर्वाचन आयोगले पठाएको छ । फुङलिङ गाउँपालिका-३ मा ८ सय ४४ जना पुरूष र ६ सय ८४ जना महिला गरी १ हजार ५ सय २८ जना मतदाता रहेको जिल्ला निर्वाचन कार्यालयले जनाएको छ । मङ्सिर १६ गते हुने निर्वाचनका लागि फुङलिङ गाउँपालिका-३ मा दुई ओटा मतदानस्थलमा दुई ओटा मतदान केन्द्र तोकिएको छ । निर्वाचनका लागि २४ जना कर्मचारी खटाइने तयारी गरिएको छ ।

झापा प्रतिनिधि नरेश खातीका अनुसार कन्काई नगरपालिका-६ मा वडाध्यक्ष पदका लागि हुने निर्वाचनका लागि २ हजार १ सय ६१ थान मतपत्र निर्वाचन आयोगले पठाएको छ । कन्काई नगरपालिका-६ मा १ हजार जना पुरूष र १ हजार ५८ जना महिला गरी २ हजार ५८ जना मतदाता रहेको जिल्ला निर्वाचन कार्यालयले जनाएको छ । मङ्सिर १६ गते हुने निर्वाचनका लागि कन्काई नगरपालिका-६ मा एक ओटा मतदानस्थलमा दुई ओटा मतदान केन्द्र तोकिएको छ । निर्वाचनका लागि १८ जना कर्मचारी खटाइने तयारी गरिएको छ ।

तेहृथुम प्रतिनिधि सुरेश खत्रीका अनुसार लालीगुराँस नगरपालिका-८ मा वडाध्यक्ष पदका लागि हुने निर्वाचनका लागि १ हजार ५ सय ५६ थान मतपत्र निर्वाचन आयोगले पठाएको छ । लालीगुराँस नगरपालिका-८ मा ७ सय ५० जना पुरूष र ७ सय ३१ जना महिला गरी १ हजार ४ सय ८१ जना मतदाता रहेको जिल्ला निर्वाचन कार्यालयले जनाएको छ । मङ्सिर १६ गते हुने निर्वाचनका लागि लालीगुराँस नगरपालकिा-८ मा एक ओटा मतदानस्थलमा दुई ओटा मतदान केन्द्र तोकिएको छ । निर्वाचनका लागि १८ जना कर्मचारी खटाइने तयारी गरिएको छ ।

सुनसरी प्रतिनिधि जयकृष्ण यादवका अनुसार गढी गाउँपालिका-६ मा वडाध्यक्ष पदका लागि हुने निर्वाचनका लागि ३ हजार ८ सय ३ थान मतपत्र निर्वाचन आयोगले पठाएको छ । गढी गाउँपालिका-६ मा १ हजार ८ सय ७३ जना पुरूष र १ हजार ७ सय ४९ जना महिला गरी ३ हजार ६ सय २२ जना मतदाता रहेको जिल्ला निर्वाचन कार्यालयले जनाएको छ । मङ्सिर १६ गते हुने निर्वाचनका लागि गढी गाउँपालिका-६ मा दुई ओटा मतदानस्थलमा पाँच ओटा मतदान केन्द्र तोकिएको छ । निर्वाचनका लागि ४२ जना कर्मचारी खटाइने तयारी गरिएको छ ।

ओखलढुङ्गा प्रतिनिधि सरस्वती बानियाका अनुसार मोलुङ गाउँपालिका-५ मा वडाध्यक्ष पदका लागि हुने निर्वाचनका लागि १ हजार ३ सय ९२ थान मतपत्र निर्वाचन आयोगले पठाएको छ । मोलुङ गाउँपालिका-५ मा ६ सय ६६ जना पुरूष र ६ सय ५९ जना महिला गरी १ हजार ३ सय २५ जना मतदाता रहेको जिल्ला निर्वाचन कार्यालयले जनाएको छ । मङ्सिर १६ गते हुने निर्वाचनका लागि मोलुङ गाउँपालिका-५ मा एक ओटा मतदानस्थलमा दुई ओटा मतदान केन्द्र तोकिएको छ । निर्वाचनका लागि १८ जना कर्मचारी खटाइने तयारी गरिएको छ ।

उदयपुर प्रतिनिधि राकेश नेपालीका अनुसार त्रियुगा नगरपालिका-१२ मा वडाध्यक्ष पदका लागि हुने निर्वाचनका लागि ४ हजार ४०  थान मतपत्र निर्वाचन आयोगले पठाएको छ । त्रियुगा नगरपालिका-१२ मा १ हजार ८ सय ७६ जना पुरूष र १ हजार ९ सय ७१ जना महिला गरी ३ हजार ८ सय ४७ जना मतदाता रहेको जिल्ला निर्वाचन कार्यालयले जनाएको छ । मङ्सिर १६ गते हुने निर्वाचनका लागि त्रियुगा नगरपालिका-१२ मा एक ओटा मतदानस्थलमा चार ओटा मतदान केन्द्र तोकिएको छ । निर्वाचनका लागि ३० जना कर्मचारी खटाइने तयारी गरिएको छ । त्यसैगरी बेलका नगरपालिका-९ मा वडाध्यक्ष पदका लागि हुने निर्वाचनका लागि ३ हजार २ सय ९३ थान मतपत्र निर्वाचन आयोगले पठाएको छ । बेलका नगरपालिका-९ मा १ हजार ५ सय ७२ जना पुरूष र १ हजार ५ सय ६४ जना महिला गरी ३ हजार १ सय ३६ जना मतदाता रहेको जिल्ला निर्वाचन कार्यालयले जनाएको छ । मङ्सिर १६ गते हुने निर्वाचनका लागि बेलका नगरपालिका-९ मा एक ओटा मतदानस्थलमा तीन ओटा मतदान केन्द्र तोकिएको छ । निर्वाचनका लागि २४ जना कर्मचारी खटाइने तयारी गरिएको छ ।

इन्सेक कोशी प्रदेश कार्यालय, विराटनगर