समाचारहरू

निर्वाचन आयोगले रिक्त रहेका स्थानीय तहमा निर्वाचनका लागि सरकारलाई सिफारिस गरेकै दिन मन्त्रीपरिषदको बैठकले ०८१ मङ्सिर १६ गते रिक्त रहेका स्थानीय तहमा निर्वाचन गर्ने निर्णय गरेको छ ।

निर्वाचन आयोगले भदौ ३० गते सरकारलाई स्थानीय तहमा रिक्त रहेका पदमा निर्वाचन गर्नका लागि मिति सिफारिस गरेको थियो ।

नेपालको संविधान तथा स्थानीय तह निर्वाचन ऐन २०७३ ले स्थानीय तहका निर्वाचित जनप्रतिनिधिको पदावधि समाप्त नहुँदै निजको पद कुनै कारणले रिक्त भएमा र एक वर्षभन्दा बढी पदावधि बाँकी रहेको अवस्थामा बाँकी अवधिका लागि उपनिर्वाचनमा सरकारलाई आयोगले परामर्श दिनुपर्ने व्यवस्था गरेकाले परामर्श दिइएको निर्वाचन आयोगका सहायक प्रवक्ता दुर्गाप्रसाद चालिसेले बताउनु भयो ।

बागमती प्रदेशका दोलखाको गौरीशङ्कर गाउँपालिका उपाध्यक्ष, काठमाडौँको किर्तिपुर नगरपालिका प्रमुख, किर्तिपुर नगरपालिकाकै वडा नं १ र ४ का वडाध्यक्ष, काठमाडौँ महानगरपालिका वडा नं १६ का वडाध्यक्ष, नुवाकोटको ककनी गाउँपालिका वडा नं २ का वडाध्यक्ष र मकवानपुरको हेटौँडा उपमहानगरपालिका वडा नं १२ का वडाध्यक्ष पदका लागि लागि निर्वाचन हुने निर्वाचन आयोगले जनाएको छ ।

गौरीशङ्कर गाउँपालिकाका उपाध्यक्ष श्यामसुन्दर तामङको हृदयघातका कारण निधन भएपछि सो पद रिक्त भएको हो । त्यसैगरी मिर्गौलासम्बन्धी रोगबाट पीडित किर्तिपुर नगरपालिकाका प्रमुख राजकुमार नकर्मीको उपचारका क्रममा वीर अस्पतालमा निधन भएपछि सो पद रिक्त भएको हो । तामाङ र नकर्मी दुवै जना नेपाली कांग्रेसबाट निर्वाचित जनप्रतिनिधि थिए ।

स्थानीय तह निर्वाचन ऐन २०७३ बमोजिम रिक्त रहेका पदहरूको पदावधि १ वर्षभन्दा बढी बाँकी रहेको अवस्थामा निर्वाचन आयोगको परामर्शमा नेपाल सरकारले मिति तोकी उपनिर्वाचनद्वारा रिक्त पदको पूर्ति गरिने व्यवस्था छ ।

अनलाइन डेस्क