समाचारहरू

निर्वाचन आयोगले अगामी वैशाख ३१ गते तय गरिएको स्थानीय तहको निर्वाचनका लागि आचारसंहिता, २०७३ जारी गरेको छ । आयोगले फागुन १८ गते एक विज्ञप्ति जारी गर्दै नेपाल सरकार, मन्त्री, कर्मचारी, सार्वजानिक पद धारण गरेका व्यक्ति, राजनीतिक दल, गैरसरकारी संस्थालगायतलाई आजैबाट लागु हुने गरी र उम्मेदवारको हकमा भने मनोनयन दर्ता भएपछि (वैशाख २६ गतेदेखि) लागु हुने गरी आचारसहिंता जारी गरेको हो ।

आचारसंहिता लागुसँगै सरकारले कर्मचारी सरूवा, बढुवा, नियुक्ति र नयाँ योजना तर्जुमा गर्न वा निर्वाचनलाई प्रभावित गर्ने कुनै पनि काम वा प्रचारप्रसार गर्न नपाउने आयोगले जनाएको छ । आचारसंहिता जारी सम्बन्धमा आजै आयोगले प्रधानमन्त्री पुष्पकमल दाहाल र सरकारी अधिकारीहरूलाई जानकारी गराएको आयोगका प्रवक्ता इला शर्माले जानकारी दिइन् ।

जारी आचारसंहितामा कुनै पनि गैरसरकारी संस्थाले कुनै दल वा व्यक्तिको पक्षपोषण गर्न नपाउने, कुनै पनि राजनीतिक दलले मतदानका लागि कसैलाई पनि डर, त्रास, धम्की दिन वा प्रभोलन देखाउन नपाउने उल्लेख छ । त्यस्तै आचारसंहिताले हेलिकप्टरको प्रयोगलाई पूर्ण रूपमा निषेध र गाडीको प्रयोगलाई सिमा निर्धारण गरेको छ ।

यसैबीच केन्द्रीय सुरक्षा समितिको आज बसेको बैठकले स्थानीय निर्वाचनको लागि २ लाख २६ हजार सुरक्षाकर्मी परिचालन गर्ने निर्णय गरेको छ । बैठकले निर्वाचनको सुरक्षा योजना २०७३/७४ पारित गर्दै निर्वाचनको आवश्यक तयारी बारे छलफल गरेको थियो ।

विवेक ढुङ्गाना