समाचारहरू

भूमि सुधार तथा मालपोत कार्यालयमा कर्मचारी अभाव र अनलाइन सेवा सुस्त हुँदा सेवाग्राहीहरु मर्कामा परेको भन्दै सेवा चुस्त बनाउन अधिकारकर्मीले आग्रह गरेका छन् ।

सहज र प्रभावकारी सेवा प्रवाहका लागि अनलाइन सेवा सुरू गरेपनि काम हुन सकेको छैन । भूमिसुधार र मालपोत कार्यालय एउटैमा गाभिएपछि एउटै कार्यालय बनेको भूमि तथा मालपोत कार्यालयमा ५१ जनाको दरबन्दी रहेकोमा २२ जनाको दरबन्दी खाली रहेको छ ।

भएका कर्मचारी मध्येपनि ०७५ चैत ४ गते सरकारी जमिन किर्ते गरी व्यक्तिको नाममा पास गरेको आरोपमा भूमि सुधार तथा मालपोत कार्यालयका चारजना कर्मचारीलाई प्रहरीले गिरफ्तार गरेको थियो ।

कर्मचारी गिरफ्तार भएसँगै मालपोत कार्यालयमा कर्मचारी अभावले काममा ढिलाई हँुदै आएको छ । कालिकोट जिल्लाका कालुप्रसाद उपाध्याय आफ्नो कामकालागि मालपोत कार्यालयमा चैत १८ गतेदेखि लाइनमा बस्दै आएपनि कर्मचारी नभएको र भएका कर्मचारीहरुको ढिलाई गरेका कारणले अहिलेसम्म काम नभएको बताउन् ।

मालपोतका कर्मचारीहरूले भोलि आउनु भन्दै धेरै पटक बोलाएर फिर्ता पठाएको समेत उपाध्यायले गुनासो गरे ।

कोहलपुर नपा–१२ का बालुसिंह ठकुरीले कामको ढिलाइबारे कार्यालय प्रमुखसँग बुझ्दा कर्मचारी अभावले ढिलाई भएकोे जनकारी दिएको बताए ।

त्यसैगरी नामसारीका लागि आएकी राप्ती सोनारी गाँउपालिकाकी पुतली चौधरीले तीन दिनदेखि धाउँदापनि काम नबनेको बताइन् ।

भूमि सुधार तथा मालपोत कार्यालयका प्रमुख प्रेमबहादुर दौल्यालका अनुसार कर्मचारी अभावको कारणले सेवाग्राहीलाई दिने सेवामा ढिलाई भएकाले प्रमुख जिल्ला अधिकारीमार्फत सङ्घीय सरकारसँग कर्मचारी माग गरिएको छ ।

भूमि सुधार तथा मालपोत कार्यालयमा कामको ढिलाई भइरहेको सम्बन्धमा वैशाख २ गते उच्च अदालत बार नेपालगञ्जका अध्यक्ष एवम् इन्सेकका सधारण सदस्य विकास अचार्य, इन्सेक प्रदेश ५ का संयोजक भोला महतलगायत अधिकारकर्मी र सञ्चारकर्मीको टोलीले कार्यालय प्रमुख प्रेम दौल्यालसँग भेटगरी प्रभावकारी सेवा प्रवाहको व्यवस्था मिलाउन आग्रह गरेका थिए ।

स्मृति देवकोटा