सेवाग्राहीद्वारा वडा कार्यालयमा तालाबन्दी

  ०७९ जेठ १८ गते

तिलोत्तमा नगरपालिका–१ को वडा कार्यालयमा अत्यावश्यक काम  नभएको भन्दै सेवाग्राहीहरूले जेठ १७ गतेदेखि कार्यालयमा ताला बन्दी गरेका छन् ।

वडाध्यक्ष्य फर्सुराम गिरीले कसैलाई पनि कार्यवाहकको जिम्मेवारी नदिइ अनुपस्थित रहेको र फोन गर्दासमेत सम्पर्क नभए पछि आफूहरूले बाध्य भएर वडा कार्यालयमा तालाबन्दी गरेको सेवाग्राही चिरञ्जीवी देवकोटाले इन्सेक प्रतिनिधिसँगको कुराकानीमा बताउनु भयो ।

“म चार किल्ला बनाउन लगातार तीन दिनसम्म वडा कार्यालयमा धाए  तर, वडा अध्यक्ष फर्सुराम गिरीलाई भेटन नि सकिन र पटकपटक फोन गर्दासमेत फोन स्वीच अफ हुन्छ ।” देवकोटाले भन्नु भयो ।  म जस्तै अन्य सेवाग्राहीहरूले दुःख पाएकाले ताला बन्द गरिएको उहाँले बताउनु भयो ।

अध्यक्ष कार्यालयमा नआएपछि उहाँ भएकै स्थानमा आफै गएर भए पनि हस्तारक्षर गराउछौ  भनेर पटक पटक फोन गर्दा सम्पर्क भएन् त्यसैले बाध्य भएर तालाबन्दी गरेकाे देवकोटाकाे भनाइ छ ।

यस विषयमा वडा अध्यक्ष पर्शुराम गिरीसँग बुझ्न खोज्दा फोन स्वीचअफ रहेकाले सम्पर्क हुन सकेन् ।

घटनाका विषयमा तिलोत्तमा नगरपालिकाका प्रमुख रामकृष्ण खाँडले कार्यालयमा तालाबन्दी भएको भनेर आफुलाई वडा सचिवले फोन मार्फत बताएको र बुझ्ने क्रममा तीन दिनदेखि पार्टीको आन्तरीक प्रशिक्षणका लागि लुम्बिनीमा गएको भन्ने सुचना पाएको बताउनु भयो ।

प्रमुख खाँडले जेठ १८ गते कार्यपालिकाको निर्वाचन भएकोले निर्वाचन पश्चात कार्यालयमा जाने बताउनु भयो ।


रीमा बिसी