सुरक्षामा खटिएका हवल्दारमाथि ढुङ्गा प्रहार, घटनाका आरोपित गिरफ्तार

  ०७७ असोज ३ गते

पौवादुङ्मा गाँउपालिका–५ स्थित अँधेरीघाटमा सुरक्षामा खटिएका ३९ वर्षीय प्रहरी हवल्दार कुमार कटुवाललाई ढुङ्गा प्रहार गरेको आरोपमा प्रहरीले सोही ठाँउका २६ वर्षीय साङ्गेन राईलाई असोज २ गते गिरफ्तार गरेको छ ।

आरोपितले असोज १ गते सुरक्षामा खटिएका हवल्दारमाथि जिल्ला प्रवेश गर्न नदिएको आरोपमा ढुङ्गा प्रहार गरेको जिल्ला प्रहरी कार्यालयका डिएसपी कृष्णकुमार चन्दले इन्सेक प्रतिनिधिसँगको फोन सम्पर्कमा बताउनु भयो ।

कोरोना भाइरस सङ्क्रमणको जोखिम नियन्त्रणका लागि गाँउपालिकाले नाकामा प्रवेश निषेध गरेको र सोही निषेध पालना गराउने क्रममा आरोपितले सुरक्षामा खटिएका हवल्दारमाथि ढुङ्गा प्रहार गरेको डिएसपी चन्दले बताउनु भयो ।

ढुङ्गा प्रहारबाट टाउकामा चोट लागेका पीडितको उपचार विराट मेडिकल कलेज विराटनगरमा भई रहेको छ । टाउकामा चोट लागेका कारण ६ ओटा टाँका लगाईएको डिएसपी चन्दले बताउनु भयो ।

आरोपितलाई हिरासतमा राखि अनुसन्धान भईरहेको प्रहरीले जनाएको छ ।


गणेश विष्ट