सुनसरीको कोशी गाउँपालिका र धरान उपमहानगरपालिकामा मतगणना स्थगित

  ०७९ जेठ ४ गते

कोशी गाउँपालिका र धरान उपमहानगरपालिकामा मतगणनामा विवाद भएपछि गणना स्थगित भएको छ ।

कोशी गाउँपालिका–५ मा ८ सय २४ ओटा मतपत्रको मुचुल्का गरिएकोमा गणनाका क्रममा ८ सय ३२ ओटा मतपत्र भेटिएपछि जेठ ३ गते रातिदेखि गणना रोकिएको छ ।

मुचुल्का भन्दा आठ ओटा मतपत्र गणनाका क्रममा पाइएपछि विवाद सुरू भएको थियो ।

मुचुल्का भन्दा बढी आठ ओटा मतपत्र गणनाका क्रममा भेटिएपछि नेकपा एमालेका एजेन्टहरूले छानबिनको माग गर्दै हल्लापछि मतगणना कार्य रोकिएको हो ।

कोशी गाउँपालिका–५ मा जनता समाजवादी पार्टीबाट वडाध्यक्ष पदका उम्मेदवार देवकृष्ण यादव र एमालेबाट वडाध्यक्ष पदका उम्मेदवार अजय कुसियैतले मतगणनामा धाँधलीको आशङ्का गर्दै निर्वाचन अधिकृतको कार्यालयमा निवेदन दिनु भएको छ ।

निवेदनपछि राजनीतिक दलका प्रतिनिधि, उम्मेदवार र निर्वाचन आयोगका कर्मचारीबिचको वार्ता निश्कर्षविहीन भएपछि मतगणना कार्य सुचारू हुन सकेको छैन ।

सर्वपक्षीय छलफलमा मतपत्र बढी भेटिएको विषयमा निर्वाचन आयोगमा पठाउने र माथिबाट आउने आदेश वा निर्णय अनुसार अगाडि बढ्ने बिषयमा छलफल भएको छ ।

मतगणनामा स्वच्छ नहुनुमा निर्वाचन आयोग र अधिकृतको पनि संलग्नता रहेको आरोप उम्मेदवारको छ ।

निर्वाचन अधिकृत एकराज अधिकारीले विवाद समाधान गरेर मतगणनाको कार्य अघि बढाउने बताउनु भएको छ ।

धरान उपमहानगरपालिका मतगणना कार्य विवादका कारण स्थगित भएको छ ।  जेठ ४ गते दिउँसोबाट धरान उपमहानगरपालिका–२० को मतगणना भईरहेको अवस्थामा १८ ओटा मतपत्र मतदान अधिकृतको हस्ताक्षर विनाको भेटिएपछि विवाद सुरू भएको थियो ।

मतदान अधिकृतको हस्ताक्षर बिनाको मतपत्र रद्द गर्ने निर्णयले वडा–२० मा माओवादी केन्द्र पराजित भएपछि विरोध शुरू भएको छ ।

माओवादी केन्द्रका कार्यकर्ताहरूले मतगणनास्थल निर्वाचन अधिकृतको कार्यालयअघि प्रर्दशन गरेपछि मतगणना रोकिएको छ ।

वडा–२० को मतगणनाका क्रममा मतदान अधिकृतको हस्ताक्षर बिनाको मतपत्र भेटिए पनि सबै वडाको मतगणनामा अवरोध सिर्जना गरिएको छ ।

नेकपा माओवादी केन्द्रका कार्यकर्ताहरूले जनताले दिएको मतको मतपत्रले मान्यता पाउनुपर्ने माग गरेका छन् ।

उनीहरूले मतदान अधिकृतलाई कारबाही गर्नुपर्ने र पुनः मतदानको माग गरेका छन् ।

मतगणना स्थगितपछि भएको सर्वदलीय बैठकमा कानुन वमोजिम मतदान अधिकृतको हस्ताक्षर नभएको मतपत्र रद्द हुने निर्णय गरिएपछि माओवादी केन्द्रले विरोध जनाएको छ ।

मतदान अधिकृतको हस्ताक्षर विनाको १८ ओटा मतपत्रमा ११ ओटा मतपत्रमा नेकपा माओवादी केन्द्रको प्यानललाई भोट दिएको माओवादी केन्द्रका नेता, कार्यकर्ताहरूको दाबी छ ।

निर्वाचन अधिकृत पुष्करराज नेपालले सर्वदलीय बैठकबाट समस्या समाधन गरी मतगणना कार्य अघि बढाउने बताउनु भएको छ ।

photo 2022518 Sunsari (1)


जयकृष्ण यादव