समाचारहरू

पतिको कुटाइबाट गम्भीर घाइते भएकी रोल्पा थवाङकी ३८ वर्षीया सुनकुमारी नेपालीको उपचारका क्रममा मृत्यु भएपछि भैरहवामा नै कात्तिक ३० गते अन्त्येष्टी गरिएको छ । उपचारकै क्रममा रुपन्देहीस्थित भैरहवा मेडिकल कलेजमा कात्तिक २७ गते उनको मृत्यु भएको थियो ।

पीडित महिलाको टाउको, गिजा तथा दाँतमा गम्भीर चोट तथा शरीरभरि निलडाम भएकी सुनकुमारीलाई इलाका प्रहरी कार्यालय थवाङले उद्धार गरी स्थानीय घर्ती गाउँ अस्पतालमा उपचार गरी थप उपचारको लागि भैरहवा मेडिकल कलेजमा रिफर गरेको थियो ।

आर्थिक अभावका कारण समयमै उपचार नपाएकी सुनकुमारीले पछिल्लो समयमा पत्रकारहरूको संस्था लुम्बिनी प्रेस क्लबको नेतृत्वमा सुनकुमारी बचाउ अभियान सञ्चालन गरी उपचार गराइएको  थियो ।

यसैबिच आमाको मृत्यु भएको र बुवा थुनामा रहेका कारण छोरी विनिता नेपालीको लालनपालन, शिक्षा, स्वास्थ्यलगायतका सम्पूर्ण जिम्मा नेपाल सरकाले लिने रुपन्देहीका प्रमुख जिल्ला अधिकारी विष्णुप्रसाद ढकालले बताए  ।

प्रमुख जिल्ला अधिकारी ढकालले भने–‘सुनकुमारीको छोरी विनितालाई लालनपालन गर्ने संरक्षक कोही नभएकोले लालनपालन, शिक्षा दीक्षालगायतका सम्पूर्ण जिम्मा सरकारले लिन्छ । हामी त्यसको तारतम्यमा छौँ ।’ नावालिका विनितालाई अहिले जिल्ला बालकल्याण समितिको रेखदेखमा राखिएको छ ।

रीमा बिसी