समाचारहरू

खार्पुनाथ गाउँपालिका–२ स्थित आधारभूत स्वास्थ्य सेवा केन्द्र थालिका लागि डेलिभरी बेड अभाव भएपछि सुत्केरी महिलाहरू स्वास्थ्य संस्थाबाट पाउने सेवासुविधाबाट बञ्चित हुने गरेका छन् ।

उक्त स्वास्थ्य संस्थामा गत दुई वर्षदेखि सुत्केरी आमाका लागि सुत्केरी गराउने बेडको अभाव भएपछि सो ठाउँका सुत्केरी महिलाहरू नेपाल सरकारको ३ हजार र कर्णाली प्रदेशको २ हजार रुपियाँ सुत्केरी प्रोत्साहन भत्ताबाट बञ्चित हुँदै आएको स्थानीय लामा रावलले गुनासो गर्नु भएको छ ।

स्थानीय रावलका अनुसार गाउँमै स्वास्थ्य संस्था भएर पनि स्वास्थ्य संस्थामा सुत्केरी गराउने बेड नहँदा नेपाल सरकारबाट उपलव्ध हुने सेवा सुविधाबाट बञ्चित हुनु परेको छ । दुई वर्ष अगाडी गाउँमा स्वास्थ्य संस्था नभएपछि वडा नम्वर ३ को राया स्वास्थ्यचौकीमा लैजाने गरेको भए पनि हाल आफ्नै गाउँमा स्वास्थ्य संस्था स्थापना गरिएको छ । तर यहाँ डेलिभरी बेड नभएपछि घरमै सुत्केरी हुनेको संख्या वृद्धि भएको स्थानीय रावलको भनाई छ ।

दुई वर्षदेखि हालसम्म मात्रै ६० भन्दा बढि सुत्केरी महिला उक्त सेवा सुविधाबाट बञ्चित हुँदै आएको स्थानीयले गुनासो गरेका छन् ।
सो स्वास्थ्य संस्थामा डेलिभरी वेड नभएपछि अहिले पनि करीव ४ घण्टाको पैदल मार्फत राया स्वास्थ्यचौकीमा जानु पर्ने बाध्यता छ । सो स्वास्थ्य संस्थामा बेडको समस्या हुने गरेपछि इन्चार्ज रुपसिंह जेठाराले खार्पुनाथ गाउँपालिका स्वास्थ्य शाखा र आफ्नै वडा कार्यालयमा हारगुहार गरेको बताउनु भएको छ ।

तर गाउँपालिका स्वास्थ्य शाखाले भने सो सामगी्रका लागि पहल गरि रहेको भए पनि वडा कार्यालयको भने कुनै सकारात्मक भूमिका नरहेको इन्चार्ज जेठाराले गुनासो गर्नु भएको छ । उहाँले डेलिभरी वेडको मात्रै नभई अन्य विभिन्न नेट इन्टरनेट, भौतिक संरचना, विधुत तथा सोलारको पनि आवश्यकता रहेको गुनासो गर्नु भएको छ ।

गाउँपालिका स्वास्थ्य शाखा संयोजक बलिराज शाहीका अनुसार स्वास्थ्य संस्थामा सुत्केरी हुने महिलाहरूलाई बेडको अभाव भएको देखिएपछि जिल्ला अस्पताल हुम्लालाई पनि अनुरोध गरिएको बताउनु भएको छ ।

नन्द सिंह