समाचारहरू

काठमाडौँ महानगरपालिका ११ स्थित थापाथलीको सुकुम्बासी बस्तीका घरटहरा भत्काउने क्रममा महनगरका सुरक्षाकर्मी र स्थानीयबीच ०७९ मङ्सिर १२ गते अपराह्न झडप भएको छ ।

सो झडपमा नगर प्रहरी प्रमुख राजु पाण्डे शर्मिला बोगटीलगायत १४ जना घाइते भएका छन् ।

झडपमा टाउकोमा गम्भीर चोट लागेका तीन जनाको थापाथलीकै नर्भिक अस्पतालमा उपचार भइरहेको छ ।

यसबीच काठमाडौं महानगरले ‘अनधिकृत संरचना हटाउन जाँदा नगर प्रहरीमाथि साङ्घातिक आक्रमण गर्नेहरूको नाम खुलाएर कानुनी कारवाहीका लागि प्रहरी परिसर टेकुलाई पत्राचार गरेको’ जनाएको छ।

घटना बारे काठमाडौँ महानगरपालिकाका प्रवक्ता नविन मानन्धरले प्रेस विज्ञप्ति जारी गर्दै ‘अधिकार सम्पन्न बागमती सभ्यता एकीकृत विकास समितिको अनुरोधमा बागमती किनारामा रहेको सार्वजनिक जग्गा अतिक्रमण गरी बनाइएका अनधिकृत संरचना भत्काउन जाने क्रममा महानगरीय प्रहरी बलका प्रमुखसहितका प्रहरी घाइते भएका छन् ।

नगर प्रहरी शर्मिला बोगटीलाई शरीर बन्धक बनाई गम्भीर रुपमा घाइते बनाएका कारण उहाँसहित तीन जना प्रहरीको नर्भिक अस्पतालमा आइसियूमा उपचार भइरहेको’ उल्लेख छ।

यसैगरी विज्ञप्तिमा कर्तव्यका सिलसिलामा प्रहरीमाथि आक्रमण हुन दुःखद भएको भन्दै घटनामा संलग्नमाथि कानुनी कारबाही गर्न सम्बन्धित निकाय र पदाधिकारीलाई अनुरोध गरिएको छ ।

यसैबीच मेयर बालेन शाह र उपमेयर सुनिता डङ्गोल नर्भिक अस्पतालमा पुगेर घाइतेहरूको स्वास्थ्य स्थितिबारे जानकारी लिएका छन्।

इन्सेक बागमती प्रदेश कार्यालय, हेटौँडा