सीमाङ्कनको विरोधमा भएको आन्दोलनमा ज्यान गुमाएका कुँवरको प्रथम स्मृति दिवस

  ०७३ भदौ ६ गते

सङ्घीय संरचनामा कर्णाली अञ्चललाई सुदूरपश्चिमसँग गाभेको विरोधमा भएको आन्दोलनका क्रममा मृत्यु भएका ताम्ती गाविस-१ सर्मीगाउँका २५ वर्षीय हरिबहादुर कुँवरको सम्झनामा भदौ ६ गते श्रद्धाञ्जली सभा सम्पन्न भएको छ । विशेष अधिकारसहितको कर्णाली स्वायत्त प्रदेशको मागगर्दै आन्दोलनका क्रममा ०७२ साउन ३१ गते गोली लागेर घाइते भई उपचारको क्रममा शिक्षण अस्पताल काठमाडौमा हरिबहादुरको भदौ ६ गते मृत्यु भएको थियो । आन्दोलनका क्रममा ज्यान गुमाएका हरिबहादुरलाई नेपाल सरकारले सहिद घोषणा गरेको थियो ।

उक्त आन्दोलनका क्रममा हरिबहादुर कुवरसहित करिब १२ जना प्रदर्शनकारी घाइते भएका थिए भने करिब १२ ओटा सरकारी कार्यालय आगजनी तथा तोडफोड गरिएका थिए ।

आन्दोलनका क्रममा घाइते भएका चन्दनाथ नपा-३ का सन्तोष बुढाथापालाई क्षतिपूर्ति स्वरुप ६६ हजार ८ सय ५४ रुपिँया र डिल्लीचौर गाविस-१ की पवित्रा बोहोरालाई ४० हजार ८ सय ६७ रुपिँया क्षतिपूर्ति स्वरुप प्रदान गरिएको थियो । राज्यले शहीद कुवँरका परिवारलाई १० लाख रकम राहत स्वरुप प्रदान गरेको थियो ।


मानदत्त रावल