समाचारहरू

चुनाव प्रचारको क्रममा नेकपा एमालेका कार्यकर्ता र माओवादी केन्द्रका कार्यकर्ताबिच सिस्ने गाउँपालिका-७ मा असार १० गते झडप भएको छ । झडपमा माओवादी केन्द्रका ६ जना र एमालेका तीन जना र एक जना विद्यार्थी घाइते भएका छन् ।

आफ्ना पार्टीका कार्यकर्तालाई चुनाव प्रचारमा अवरोध गरी नेकपा माओवादी केन्द्रका कार्यकर्ताले आक्रमण गरेको नेकपा एमालेकी जिल्ला उपाध्यक्ष देवी ओलीले बताइन । ओलीका अनुसार एक जना वडा सदस्यको महिला उम्मेदवारसहित तीन जना गम्भीर घाइते भएका छन् ।

घाइते हुनेमा एमाले कार्यकर्ता पृथबहादुर रावत, दिपक रावत र नाम नखुलेकी महिला उम्मेदवार रहेकी छन् । चुनाव प्रचारमा बारम्बार माओवादीले अवरोध गर्ने आफ्ना कार्यकर्तालाई आक्रमण गरी विभिन्न आरोप लगाउने गरेको नेकपा एमालेकी उपाध्यक्ष देवी ओलीले आरोप लगाइन् । माओवादी केन्द्रका कार्यकर्ताले सिस्ने गाउँपालिका-७ का १९ वर्षीय विद्यार्थी राजकुमार बुढालाई पनि कुटपिट गरेका छन् ।

नेकपा माओवादी केन्द्रका सिस्ने गाउँपालिका-७ का चुनाव परिचालन समितिका संयोजक केशव रावलका अनुसार झडपमा माओवादी केन्द्रका कार्यकर्ता भुषण रावल, विष्णु बुढा, प्रेमबहादुर बुढा, गणेश बुढालगायत ६ जना घाइते छन् ।

आफूहरू मोटरसाइकलमा आइरहेको समयमा एमालेका कार्यकर्ता बाटो छेकेर बसेकाले झडप भएको रावलले बताए । उक्त क्षेत्रमा चारैतिरबाट दुवै पक्षका युवाहरू जम्मा भएकाले थप झडप हुने सम्भावना रहेको स्थानीयबासीले बताएका छन् ।

उक्त क्षेत्रमा थप प्रहरी परिचालन गरिएको र शान्ति सुरक्षा मजबुद बनाइने रूकुमका डिएसपी अङ्गुर जिसीले बताए । घाइतेहरूको स्थानीय स्वास्थ्य संस्थामा उपचार भइरहेको छ ।

आदर्श केसी