स्थानीयबासी बीच विवाद ः सुरक्षाकर्मीसहित १० जना घाइते

  ०७९ कात्तिक १२ गते

सिमकोट गाउँपालिका–३ स्थित ठेहे र सोही गाउँपालिका–५ स्थित खाद्यक्क गाउँका युवाबीच झडप हुँदा पाँच जना स्थानीय र पाँच जना प्रहरी घाइते भएका छन् ।

कात्तिक ८ गतेदेखि सिमकोट गाउँपालिकाका आठवटा वडा स्तरीय फुटबलको आयोजना गरिएको र सोही विषयमा विवाद हुँदा दुई गाँउका युवाबीच कात्तिक ८ गते झडप भएको थियो ।

झडपमा घाइते हुनेमा खाद्यक गाउँका १२ वर्षीय सुजन रोकाया, १४ वर्षीय सुजित रोकाया, १७ वर्षीय सार्थक रोकाया, १६ वर्षीय प्रतिक भण्डारी र १७ वर्षीय सुभाष बोहरा घाइते भएको अभिभावक सुशीला रोकायाले बताउनु भएको छ ।

झडपमा पाँच प्रहरी घाइते भएको भनिएपनि डीएसपी कृष्णराज ओझाले प्रहरीको नाम दिनु भएन । अन्य पाँच जना नेपाल प्रहरीका जवानदेखि असईसम्मका प्रहरी रहेको डीएसपी कृष्णराज ओझाले बताउनु भयो ।

डीएसपी ओझाका अनुसार स्थानीयले प्रहार गरेको ढुङ्गा लाग्दा तीन जना प्रहरी सिकिस्त घाइते भएका छन् । घाइते एक जना प्रहरीलाई तत्काल जिल्ला बाहिर पठाइएको र अन्यको जिल्ला अस्पताल हुम्लामा उपचार भएको डीएसपी ओझाले जानकारी दिनु भएको छ ।
त्यस्तै युवाहरूबीच झडप भए पनि आफ्ना तीन जना छोरालाई सशस्त्र प्रहरी बलले लठ्ठीचार्ज गर्दा घाइते भएको र छोराको जिल्ला अस्पतालमा उपचार गर्नु परेको सिमकोट गाउँपालिका उपाध्यक्ष सेमत रहनु भएकी सुशीला रोकायाले आरोप लगाउनु भएको छ ।

विवादको शुरुवात कसरी भयो भन्ने विषयमा अनुसन्धान भइरहेको डीएसपी ओझाले बताउनु भयो ।

घटनाका मुख्य दोषीको खोजी कार्य तथा अनुसन्धान भईरहेको डीएसपी ओझाको भनाई छ ।


नन्द सिंह