समाचारहरू

सिन्धुली कारागारमा सजाय भोगिरहेका दुधौली नगरपालिका-१०, लखिमाका ३० वर्षीय विमल थापाको उपचारका क्रममा ०८० कात्तिक ३० गते मृत्यु भएको छ ।

कारागार कार्यालय, सिन्धुलीका निमित्त प्रमुख मात्रिकाप्रसाद पहाडिका अनुसार कात्तिक २९ गते राति कारागारमै तिहार मनाएर देउसी खेलिसकेपछि खाना खाएर सुतेकोमा कात्तिक ३० गते बिहान ३ बजे बेहोस अवस्थामा भेटिएपछि तत्काल उपचारको लागि जिल्ला अस्पताल सिन्धुलीमा लगिएको थियो । उहाँको उपचारको क्रममा सोही दिन मृत्यु भएको हो । शव पोष्टमार्टमको लागि सोही अस्पतालमा राखिएको छ ।

विमल थापालाई प्रहरीले सवारी ज्यान मुद्दामा ०८० भदौ २२ गते गिरफ्तार गरेको थियो । सिन्धुली जिल्ला अदालतले असोज १७ गते थापालाई पुर्पक्षका लागि थुनामा पठाउने आदेश गरेको थियो । थापाको मृत्युको कारणबारे अनुसन्धान भइरहेको जिल्ला प्रहरी कार्यालयका डिएसपी चिरञ्जीवी दाहालले इन्सेकलाई जानकारी दिनुभयो ।

नबिनबाबु अधिकारी