समाचारहरू

कमलामाई नगरपालिका-५ सिलामेकी २५ वर्षीया गङ्गा गुरुङ श्रेष्ठको सिन्धुली अस्पतालमा मृत्यु भएको विषयलाई लिएर ०८० जेठ १० गते प्रदर्शनकारी र प्रहरीबीच झडप हुँदा ६ जना प्रहरी घाइते भएका छन् ।

आक्रोशित भिडले सिन्धुली अस्पताल तोडफोड गर्न खोजेपछि रोक्ने क्रममा प्रहरीलाई ढुङ्गा हानेका थिए । आक्रोशित भिडको ढुङ्गा प्रहारबाट ६ जना प्रहरी घाइते भएको जिल्ला प्रहरी कार्यालयका डिएसपी चिरञ्जीवी दाहालले जानकारी दिनुभयो ।

उहाँका अनुसार पाँच जनाको अवस्था सामान्य रहेको र एक जनालाई थप उपचारका लागि काठमाडौँ लगिएको छ ।

घाइते मध्ये इन्स्पेक्टर रामभक्त भट्टराई, सई कैलाश बुढाथोकी, प्रहरी जवान राम बहादुर कार्की, प्रवेश कुमार यादव र सहायक हवल्दा रोशन श्रेष्ठ घाइते हुनु भएको छ । उहाँहरूको अवस्था सामान्य रहेको छ भने प्रहरी सहायक हवल्दार रोशन श्रेष्ठको अनुहार र गोडामा चोट लागेको छ ।

प्रहरीले कमलामाई नगरपालिका-११ का ३१ वर्षीय दिनेश मोक्तान र कमलामाई नगरपालिका-५ का राज मगरलाई गिरफ्तार गरेको छ ।

प्रहरीले भिड नियन्त्रण गर्न २८ सेल अश्रुग्यास र दुई राउण्ड हवाई फाएर गरेको डिएसपी दाहालले जानकारी दिनुभयो ।

यसैबीच जेठ १० गते अपराह्न अस्पताल प्रसाशन र पीडितका आफन्तबीच सहमति भएपनि विरोध प्रदर्शन कायम नै रहेको छ ।

नबीनबाबु अधिकारी