समाचारहरू

नजिकैको स्वास्थ संस्थामा स्वास्थकर्मी नहुँदा खार्पुनाथ गाउँपालिका–३ का सामान्य रोगका बिरामीलाई पनि जिल्ला अस्पताल नै लैजानुपर्ने बाध्यता रहेको छ ।

गाउँपालिका बासिन्दा बिरामी हुँदा उपचारका लागि नजिकै रहेको रायाँ स्वास्थ्यचौकीमा पुगेपनि स्वास्थकर्मी नहुँदा सामान्य बिरामीलाई पनि सदरमुकाम जानुपर्ने बाध्यता हुने गरेको स्थानीय मानबहादुर परियारले बताए ।

बिरामी बुवालाई सिमकोटबाट औषधि ल्याएपनि सुई लगाइदिने स्वास्थकर्मी नहुँदा समस्या भएको परियार बताउँछन् । स्वास्थ्यचौकीमा औषधि भएतापनि दिने स्वास्थ्यकर्मी नहुँदा समस्या भएको स्थानीय टेकबहादुर बुढा गुनासो गर्छन् ।

सो स्वास्थ्यचौकीमा एकजना हेल्थ असिस्टेण्ट, एक अहेब र दुईजना अनमी गरी चार जनाको दरबन्दी भए पनि एक महिना अघिदेखि स्वास्थ्यचौकीमा स्वास्थ्यकर्मी नहुँदा बिरामी उपचार नगराई फर्कनुपर्ने बाध्यता रहेको स्थानीयको आरोप छ ।

स्वास्थ्यकर्मी नभएपछि सरसफाई स्वच्छता प्रवर्धन संस्था अन्तरगतका कर्मचारीले दिएको औषधि लिएर बिरामी घर फर्किनुपरेको स्थानीयको भनाई छ ।

स्वास्थचौकीका स्वास्थ्य इञ्चार्ज भगवती श्रेष्ठ र अनमी लोकमाया ओली एक महिना अघि घर बिदामा गएको साथै सोही समयमा अनमी कविता बुढा तालिमकै सिलसिलामा सुर्खेत गएको खार्पुनाथ गाउँपालिका–३ का वडा सदस्य गुलम रावलले बताए ।

बाँकी रहेका स्वास्थ्यचौकीका अहेब ओमप्रकाश कुसवाहा पनि लगत्तै होली मनाएर औषधि लिएर आउने भन्दै सदरमुकाम सिमकोट झरेकाले अझै नफर्किएको स्वास्थचौकीमा औषधी भएपनि दिने मान्छे नहुँदा समस्या भएको रावलले बताए ।

सो बारेमा खार्पुनाथ गाउँपालिकाका अध्यक्ष कर्णबहादुर रावलसँग बुझ्दा स्वास्थ्यकर्मी कोही तालिममा र कोही घर विदामा गएका छन् भन्ने कुरा आफूकहाँ पनि जानकारी आएको तर गाउँपालिका स्वास्थ्य संयोजक रुद्रविर शाहीलाई आफूले स्पष्टिकरण माग्दा पनि जानकारी नगराएको बताए ।

स्वास्थ्य संयोजक रुद्रविर शाहीले भने स्वास्थ्य संस्थाका स्वास्थ्यकर्मीलाई स्वास्थ्य चौकीमा फर्कन आग्रह गर्दै पत्राचार गरिएको र उपस्थित नभएमा कारवाही गरिने बताएका छन् ।

नन्द सिंह