समाचारहरू

पश्चिम नेपालको थारु जातिमा देखिएको सिकलसेल एनिमिया रोग जाँच्ने मेशिन प्रयोग नहुँदा बिरामी समस्यामा परेका छन् ।

नेपालगञ्जमा रहेको २९ लाख रुपियाँको मेशिन प्रयोग नभएपछि सिकलसेल एनिमिया जाँच्न आउने बिरामीहरू रोग छ छैन भन्ने एकीन गर्न महङ्गो रकम खर्च गरेर भारत जानुपर्ने बाध्यता रहेको बिरामीहरू बताउँछन् ।

नेपाल सरकारले सिकलसेललाई जनस्वास्थ्य समस्याका रूपमा लिएर १ लाख रुपियाँ बराबरको औषधि निशुल्क दिने व्यवस्था मिलाएको छ । दसैँ अगाडि नै मेशिन आएपनि प्राविधिक समस्याका कारण जडान हुन नसकेको भेरी अञ्चल अस्पतालका मेडिकल सुपरिटेण्डेन्ट डाक्टर श्यामसुन्दर यादवले बताए ।

लामो समयदेखि सिकलसेल एनिमियाको उपचार गर्दै आएका डाक्टर राजन पाण्डेका अनुसार थारु जातिमा देखिने उक्त रोग वंशाणुगत रहेको र समयमा उपचार हुन नसके ज्यानसमेत जाने र सन्तानहरूमा सर्दै जाने हुन्छ ।

सरकारले निशुल्क सेवा लिन भेरी अञ्चल अस्पतालबाट परिचय पत्र लिनुपर्ने व्यवस्था मिलाएको छ । हालसम्म २ सय ४४ जनाले परिचायपत्र लिएका र १ हजार भन्दा बढी बिरामी सम्पर्कमा आएको डा. पाण्डेले जानकारी दिए ।

विनोद पाण्डे