साहारा खोज्दै अपाङ्गता भएका व्यक्तिको परिवार

  ०७३ मङ्सिर ५ गते

परिवारमा एक दुई जना अपाङ्ग भएको कुरा धेरैले देखे सुनेका होलान् । तर, बिच्छ्याँ-६ देउसैनका सिउमल थापाको परिवारका सात जना मध्ये पाँच जना जन्मैदेखि पूर्ण अपाङ्ग छन् । सिउमल र उनकी पत्नी माता कान सुन्दैनन् र बोल्न पनि सक्दैनन् । २० वर्षीय जेठो छोरा विरबहादुर, माइली छोरी अञ्जना र कान्छो विसन दृष्टिविहीन छन् । १४ वर्षीया छोरी बिजौरा र ११ वर्षीय कान्छो छोरा धनमलले आमाबाबुसहित सबैको स्याहार गर्छन् ।

गाउँमा अलिकति जग्गाजमीन भएपनि खेती गर्ने मानिस नभएकाले बाँझै रहने सिउमलले बताए । 'छिमेकीले सहयोग गरेका बेला उनको पाखो बारीमा खेती लाग्छ । त्यसबाट फलेको अनाजले दुई महिनाजति धान्छ । अरू बेला अधिकांश समय परिवारमा बिचल्ली पर्छ । सरकारले दिने सामाजिक सुरक्षा भत्ताबाट तिर्ने शर्तमा गाउँका पसलेले उधारो पत्याए परिवारको छाक टर्छ ।'-सिउमलले भने ।

'भत्ता पाएपछि तिर्छौँ ।'-बिरबहादुरले भने-'हाम्रो परिवारको भाग्यमै यस्तो दुःख लेखेको रैछ । हामीलाई सहारा दिने को भेटिएला ?' विकटको बसोवास अनि सहारा विहीन भएकाले सिउमलको परिवारको पीडा लुकेको छ । सरकारी तथा गैरसरकारी क्षेत्रको नजर पनि यो परिवारसम्म पर्न सकेको छैन । 'असाध्यै बिचल्ली छ सिउमल परिवारको'-छिमेकी विरबहादुर बोहराले भने-'धेरै दिन भोकै बस्नु परेको बताउँछन् । घरमा अन्न भएकाहरूले ऐँचोपैँचौ गर्छन् ।' उनले पनि भने-'यो धर्तिमा साहारा दिने मान्छे पनि पाइन्छन् रे भन्ने सुनेको छु । यदि त्यस्ता मान्छे पाए सिउमलको उद्दार हुने थियो ।'


पदम सिंह