समाचारहरू

इन्सेकद्वारा आयोजना गरेको सार्वजनिक सुनुवाइ कार्यक्रमको प्रभावले चौतारा नपा-२ का भूकम्पपीडितहरूले अवास पुनःनिर्माणको लागि पहिलो किस्ता रकम भदौ १६ गतेबाट पाउन शुरु गरेका छन् ।

चौतारा नपा-२ मा भदौ १३ गते पुनःनिर्माण प्राधिकरणका जिल्ला संयोजक र जिल्ला प्रहरी कार्यालयका प्रमुख लगायतका सरोकारवालाहरू राखेर इन्सेकले सार्वजनिक सुनुवाइ कार्यक्रम गरेको थियो । चौतारा नपाभित्र अरु सबै वडाका भूकम्प पीडितहरूले आवास पुनःनिर्माणको लागि सरकारले वितरण गर्दै आएको पहिलो किस्ता रकम पाएका थिए भने २ नम्बर वडाका नागरिकहरूले पाउन सकेका थिएनन् ।

इन्सेकले राखेको सार्वजनिक सुनुवाइ कार्यक्रममा सहभागीहरूले पहिलो किस्ताको रकम नपाएको कुरा सरोकारवालाहरूसँग राखेपछि पुनःनिर्माण प्राधिकरणका जिल्ला संयोजक भूवनेश्वर लामिछानेले कार्यक्रम स्थलबाटै मेघा बैङ्कमा फोन गरेका थिए ।

कार्यक्रम स्थलबाटै फोन गरेपनि १६ गतेबाट रकम वितरण शुरु गरिएको प्राधिकरणका संयोजक लामिछानेले बताए । उनले भने-'मैले त नगरपालिका भित्रका सबैले पहिलो किस्ताको रकम पाए होलान भन्ने ठानेको थिएँ । तर, वडा नं. २ का भूकम्प पीडितहरूले नपाएको कुरा सार्वजनिक कार्यक्रममा गएर मात्र थाहा पाएँ । त्यसपछि मैले रकम वितरण गर्न पहल गरेको हुँ ।'

स्थानीय गोमा खत्रीले खुशी व्यक्त गर्दै इन्सेक प्रतिनिधिसँग कुरा गर्दै भनिन्- 'इन्सेकले सार्वजनिक सुनुवाइ कार्यक्रम राखेपछि हामीले खुलेर आफ्ना समस्या राखेका हौं । कुरा राखेपछि पहिलो किस्ता रकम पाइने भइयो ।'

नतिबावु धिताल