समाचारहरू

सार्वजनिक सरोकारका सवालमा सामाजिक सङ्घ संस्था र नागरिक समाजका अगुवाले प्रभावकारी पैरवी गर्न इन्सेकका अध्यक्ष डा. कुन्दन अर्यालले जोड दिनुभएको छ ।

कर्णाली प्रदेशको मानव अधिकार अवस्था सम्बन्धमा फागुन ३० गते वीरेन्द्रनगरमा सामाजिक सङ्घ संस्थाका अगुवासँगको छलफलमा अध्यक्ष अर्यालले उक्त विषयमा सामाजिक सङ्घ संस्थाका अगुवालाई आग्रह गर्नु भएको हो ।

कर्णाली प्रदेशमा आर्थिक, सामाजिक र साँस्कृतिक अधिकारका थुप्रै सार्वजनिक सरोकारका सवाल भएकाले यस सवालमा सामाजिक सङ्घ संस्थाले संयुक्त रुपमा पैरवी गर्न आवश्यक रहेको इन्सेकका अध्यक्षले सुझाव दिनुभयो । कर्णालीमा पुराना सवारी साधनका कारण थुप्रै नागरिकको ज्यान गएको, पाठयपुस्तक समयमा उपलब्ध नहुँने लगायतका सवालमा नागरिक समाजले समस्या समाधाना लागि पहल गर्न इन्सेक अध्यक्ष अर्यालले अनुरोध गर्नुभयो ।

कर्णाली प्रदेशमा सार्वजनिक सरोकार सवालमा सबैले चासो दिनुपर्ने र समयमा यसको समाधान हुनुपर्नेमा अध्यक्ष अर्यालले जोड दिनुभयो ।
छलफलमा नेपाल वार एशोसियसनका उपाध्यक्ष उत्तमप्रसाद आचार्यले सुर्खेत जिल्ला लागु पदार्थ तथा दुव्र्यसनीको केन्द्र बन्दै गएको र यससँग सम्बन्धीत मुद्दाहरू अदालतमा आइरहेको बताउनु भयो । अहिलेको परिवेशमा सबैभन्दा धेरै बलात्कारको मुद्दा, दोस्रोमा सम्बन्धविच्छेद र तेस्रोमा लागु पदार्थ दुव्र्यसनका मुद्दा रहेको उपाध्यक्ष आचार्यले बताउनु भयो ।

सामाजिक सञ्जालमा व्यापक रुपमा महिलाको चरित्र हत्या भइरहेको र यसले मानव अधिकारमा असर गरिरहेकाले यस कार्यमा समाधानको उपाय खोजिनुपर्ने मानव अधिकारका लागि एकल महिला समूहका अध्यक्ष ममता नगालले बताउनु भयो ।

यसैगरी बहुविवाह र अन्तरजातीय विवाहले महिला हिंसा बढाइरहेको फेडोका अध्यक्ष मन्जु सुनारले गुनासो गर्नुभयो । महिला हिंसा बढने प्रमुख कारण बहुविवाह भएकाले समाजमा यस्ता घटना हुन नदिन सबै लाग्नुपर्ने उहाँले बताउनु भयो ।

छलफलमा नेपाल कानुन समाज सुर्खेतका प्रमुख मातृका प्रसाद खनालले मानव अधिकारको सवालसँगसँगै अब विद्यालय शिक्षामा जोड दिनुपर्ने सुझाव दिनुभयो । यसका साथै न्यायिक समितिको काम तथा प्रकियामा चासो दिनुपर्ने र न्यायिक समिति बलियो बनाउन आवश्यक रहेको बताउनु भयो ।

लागुपदार्थ दुव्र्यसनीमा विद्यायलका विद्यार्थीको बढदो लहर रहेको मानव अधिकार रक्षक सञ्जाल कर्णाली प्रदेश संयोजक पीताम्बर ढकालले बताउनु भयो । यसको बेलैमा समाधान नभए विकराल रुप लिनसक्ने भएकाले यसको नियन्त्रणको लागि प्रहरी प्रशासन तथा सबैले हातेमालो गर्न आवश्यक रहेको बताउनु भयो ।

गैसस महासङ्घका कर्णाली प्रदेश इन्चार्ज घनश्याम केसीले बैदेशिक रोजगारीमा गएका पति र पत्नीकोसम्बन्ध र पारिवारिक बेमेलका घटनाहरू बढ्दै गएकोमा चिन्ता व्यक्त गर्नुभयो । यसैगरी वामका उपाध्यक्ष मन्जु राना क्षेत्रीले महिला हिंसाको घटनामा वामले पहल गर्दै आएको बताउनु भयो । कर्णालीमा हालसम्म बाल सुधार गृह र सेफ हाउस नभएकाले यस कार्यमा सामाजिक सङ्घसंस्थाका अगुवाले पैरवी गर्नुपर्ने कार्यक्रमका सहभागिहरूले जोड दिनु भएको थियो ।

सामाजिक सङ्घ संस्थासँगको छलफलमा इन्सेकका अध्यक्ष डा. कुन्दन अर्याल, कार्यकारी निर्देशक बिजयराज गौतम, कर्णाली प्रदेश संयोजक नारायण सुवेदी, लुम्बिनी प्रदेश संयोजक भोला महत लगायतको सहभागिता रहेको थियो ।

प्रभा कुमारी रावत