समाचारहरू

१९ वर्षीया युवतीलाई बलात्कार गरेको कसुरमा जिल्ला अदालतले विराटनगर महानगरपालिका-३ का ५० वर्षीय विनोद राउत र ५० वर्षीय सुरज सुवेदीलाई आठ वर्ष कैद र जनही ३-३ लाख रुपियाँ जरिबानाको फैसला गरेको छ ।

जिल्ला अदालतका न्यायाधीश अम्बिकाप्रसाद दाहालको ०८० कात्तिक २२ गतेको इजलासले कसुर गरेको ठहर गर्दै कैदसँग जरिबानाको फैसला गरेको अदालतका सूचना अधिकारी ओम सुवेदीले बताउनु भयो ।

पीडित युवतीलाई आरोपितद्वयले ०७९ असार २८ गते सामूहिक बलात्कार गरेको आरोपमा पीडितले साउन ८ गते जिल्ला प्रहरी कार्यालयमा उजुरी दिनु भएको थियो ।

पीडित पक्षको उजुरीका आधारमा आरोपितलाई प्रहरीले साउन ८ गते विराटनगरबाट गिरफ्तार गरेको थियो ।

आरोपितद्वयविरूद्ध प्रहरीले जिल्ला सरकारी वकिलको कार्यालयमार्फत जिल्ला अदालतमा ०७९ भदौ ५ गते सामूहिक बलात्कार शीर्षकमा मुद्दा दर्ता गरेको थियो ।

जिल्ला अदालतका न्यायाधीश राजेशकुमार कटुवालको ०७९ भदौ ६ गतेको आदेशले आरोपितद्घय पुर्पक्षका लागि थुनामा थिए ।

विराटनगर महानगरपालिका-४ का ५० वर्षीय राउत नेपाल खेलकुद महासङ्घका केन्द्रीय सचिव हुन् । ५० वर्षीय सुवेदी विराट हेल्थ कलेजका अनुशासन इन्चार्ज हुन् ।

उनीहरूले सोही कलेजमा अध्ययनरत सुनसरी इटहरीकी १९ वर्षीया छात्रालाई सामूहिक बलात्कार गरेको आरोपमा प्रहरीले गिरफ्तार गरेको थियो ।

पीडित युवतीको स्वास्थ्य परीक्षण कोशी अस्पतालमा ०७९ साउन ८ गते गरिएको थियो ।

विनोद सुवेदी