समाचारहरू

बनेपा नगरपालिका-१० उग्रतारा जनागाल की ५७ वर्षीया नानु आलेमगरलाई भदौ १३ गते सामूहिक बलात्कार गरी हत्या गरेको आरोपमा प्रहरीले भदौ २१ गते ६ जनालाई गिरफ्तार गरेको छ ।

साथीको घरमा जान्छु भनेर भदौ ११ गते घरबाट हिँडेकोमा भदौ १३ गते नजिकैको मकैबारीमा प्रहरीले निर्वस्त्र अवस्थामा आलेमगरको शव फेला पारेको थियो ।

प्रारम्भिक अनुसन्धानबाट सामूहिक बलात्कारपछि हत्या भएको निष्कर्ष निकालेको जानकारी जिल्ला प्रहरी कार्यालय काभ्रेले भदौ २१ गते आयोजित पत्रकार सम्मेलनमा दियो ।

घटनामा संलग्न भएको आरोपमा प्रहरीले भुम्लुटार-३ का ३२ वर्षीय गोपाल परियार, धुलिखेल-७ का ३० वर्षीय साधुराम विश्वकर्मा, नमोबुद्धका २७ वर्षीय महेश परियार, नाग्रेगगर्चे-९ का ३३ वर्षीय दिलबहादुर प्रधान, सिन्धुपाल्चोक जिल्ला मेलम्चीका ३२ वर्षीय सिताराम थापा र रामेछाप जिल्ला लखनपुर-१ का २४ वर्षीय प्रकाश परियारलाई गिरफ्तार गरेको हो । सबै आरोपितहरू रिक्सा चालक र ज्यामी मजदुरहरू हुन् । मृतकका पति, दुई छोरी र एक छोरा छन् ।

भोजराज तिमल्सिना