सामूहिक बलात्कार घटनाका फरार आरोपित गिरफ्तार

  ०७८ कात्तिक ८ गते

कमलामाई नगरपालिका–५ मा भएको सामूहिक बलत्कार घटनामा संलग्न फरार पाँच जना आरोपितहरू तथा उनीहरूलाई भगाउन सहयोग गर्ने ६ जना व्यक्तिहरूलाई प्रहरीले विभिन्न स्थानबाट गिरफ्तार गरेको छ ।

१५, १६ र १७ वर्षीया तीन जना बालिकालाई असोज ३० गते कमलामाई नगरपालिका–५ मा नौ जनाले सामूहिक बलात्कार गरेका थिए ।

घटनामा संलग्न भई लुकीछिपी बस्दै आएका २२ वर्षीय आकाश मगरलाई प्रहरीले कात्तिक ७ गते सिन्धुलीको गोलन्जोर गाउँपालिका–७ खुर्कोटबाट गिरफ्तार गरेको हो ।

यसैगरी कमलामाई नगरपालिका–५ बोजे घर भएका २० वर्षीय दीपक मगर, २३ वर्षीय अर्जुन मगर, २३ वर्षीय धनबहादुर बम्जन, २१ वर्षीय मिलन लामालाई प्रहरीले ०७८ कात्तिक ५ गते महोत्तरीको बर्दिबासबाट गिरफ्तार गरेको थियो ।

उनीहरूलाई भारततर्फ भगाउने तयारी भएको अवस्थामा बर्दिबासबाट गिरफ्तार गरिएको जिल्ला प्रहरी कार्यालयका डिएसपी मनोजकुमार लामाले जानकारी दिनु भयो । घटनामा संलग्न भई फरार रहेका २१ वर्षीय विश्व राईको खोजी भइरहेको डिएसपी लामाले बताउनु भयो ।

यस्तै आरोपितहरूलाई भगाउन सहयोग गर्ने कमलामाई नगरपालिका–४ का शिव देवकोटा, कमलामाई नगरपालिका–५ का संजिव मगर, प्रेम श्रेष्ठ, सुमन थापा, कमलामाई नगरपालिका–६ का मेघबहादुर श्रेष्ठ र सर्लाही हरिवन नगरपालिका–८ का इश्वर आलेलाई समेत प्रहरीले कात्तिक ५ गते नै गिरफ्तार गरेको छ ।

आरोपित भगाउन प्रयोग भएको बा १० च १८३६ नम्बरको स्कार्पियो, प्रदेश २–०२–००३ प १२१० र प्रदेश २–०२–००४ प ५३७६ नम्बरको मोटरसाईकल समेत नियन्त्रणमा लिएको डिएसपी लामाले जानकारी दिनु भयो ।

बलात्कार घटनामा संलग्न भएको आरोपमा कमलामाई नगरपालिका–५ बोझे घर भएका २२ वर्षीय हिमा लामा, २४ वर्षीय गणेश मगर र २२ विवेक मगरलाई प्रहरीले असोज ३१ गते नै गिरफ्तार गरेको थियो ।

पीडित बालिकाहरूको स्वास्थ्य परीक्षण सिन्धुली अस्पतालमा असोज ३० गते भएको थियो ।


नविनबावु अधिकारी