समाचारहरू

३७ वर्षीया महिलालाई सामुहिक बलात्कार गरेको कसुरमा नुवाकोट जिल्ला अदालतले चार जनालाई दोषी ठहर गर्दै कैद सजायको फैसला गरेको छ ।

जिल्ला न्यायाधीश मदनबहादुर धामीको इजलासले ०७९ फागुन ३० गते गरेको अन्तिम फैसलामा शिवपुरी गाउँपालिका–५ का २५ वर्षीय उमेश पाख्रिन र लिखु गाउँपालिका–२ का सानुकान्छा तामाङलाई जनही ६ वर्ष कैद सजाय, ४५ हजार रुपैयाँ जरिबाना र पीडित राहत कोषमा नौ सय रुपैयाँ दाखिला गर्ने फैसला भएको जिल्ला अदालतमा इजलास अधिकृत तथा सूचना अधिकारी रीता लामिछानेले जानकारी दिनुभयो ।

सूचना अधिकारी लामिछानेका अनुसार सोही घटनामा संलग्न शिवपुरी गाउँपालिका–५ का २९ वर्षीय रमेश तामाङ र लिखु गाउँपालिका–२ का २६ वर्षीय भूपेश घलेलाई जनही पाँच वर्ष कैद सजाय, ४० हजार रुपैयाँ जरिबाना र एक हजार रुपैयाँ पीडित राहत कोषमा दाखिला गर्ने फैसला भएको छ ।

कसुरदारहरूले ०७६ चैत २ गते पीडित महिलाको घरमा प्रवेश गरी बलात्कार गरी धनमालसमेत लुटेको भन्दै पीडितले जिल्ला प्रहरी कार्यालयमा चैत ३ गते उजुरी दिएकी थिइन् । पीडित महिलाको स्वास्थ्य परीक्षण चैत ३ गते त्रिशूली अस्पतालमा भएको थियो ।

प्रहरीले उमेश र सानुकान्छालाई चैत ७ गते काठमाडौँबाट गिरफ्तार गर्‍यो र जिल्ला अदालतले ०७७ वैशाख ४ गते पुर्पक्षको लागि थुनामा पठाउन आदेश दिएको थियो ।

सोही घटनामा संलग्न भई फरार रहेका भूपेश र रमेशलाई ०७७ साउन २४ गते काठमाडौँबाट गिरफ्तार गर्‍यो र अदालतले साउन २५ गते पुर्पक्षको लागि थुनामा पठाउन आदेश दिएको थियो ।

नवदीप श्रेष्ठ