समाचारहरू

मुगुम कार्मारोङ गाउँपालिकामा रहेको सामुदायिक अस्पातल रिउसमा एक महिनादेखि औषधि अभाव हुँदा सो क्षेत्रका सेवाग्राही मर्कामा परेका छन् ।

माघ महिनाको अन्तिम साताबाट औषधि तथा सिरिञ्ज अभाव हुँदा सामन्य बिरामीले पनि सामुदायिक अस्पतालबाट एक घण्टा टाढाको पैदल यात्रा गरी निजी मेडिकलमा औषधि लिन जानु पर्ने बाध्यताका भएका कारण सेवाग्राही मर्कामा परेका हुन् ।

यो सामुदायिक अस्पतालका लागि आवश्यक पर्ने औषधि र सिरिञ्ज किन्नका लागि गाउँपालिकाले ३ लाख रुपियाँ विनियोजन गरेको थियो ।

उक्त रकमले साउनमा किनेको औषधि र सिरिञ्ज माघ महिनको अन्तिमसम्म पुगेको र त्यसयता सोेको अभाव भएको अस्पतालले जनाएको छ ।

गाउँपालिकालाई आवश्यक औषधि खरिदका लागि फागुन पहिलो साता सूची पठाइसकेको भएपनि अहिलेसम्म औषधि नआउँदा अस्तालमा आउने बिरामीहरू मर्कामा परेको सामुदायिक अस्पातलका प्रमुख डाक्टर भविन्द्र कार्कीले बताउनु भयो ।

‘अस्पातल नजिक मेडिकल हल छैन । सिरिञ्ज र अस्पातलामा नभएको औषधि किन्न पुलु बगर पुग्नु पर्छ । बुबालाई स्वासप्रश्वासमा समस्या भएपछि अस्पातलमा भर्ना गरेको पाँच दिन भयो । बेलाबेला औषधि किन्न आउनजान एक घण्टा टाढा पुलु पुग्नु पर्छ । निकै दुःख पाइएको छ ।’–मुगुम कार्मारोङ गाउँपालिका–६ का ४५ वर्षीय आङडाग लामाले बताउनु भयो ।

फागुन २६ गते ज्वरो आएपछि पाँच वर्षीय छोरालाई उपचार गर्न अस्पातल आएकी सोही गाउँपालिका–८ की टोमा लामाले डाक्टरलाई देखाउँदा निमोनिया भएको बताउनु भयो ।

‘छोरालाई खुवाउने औषधि अभाव भएको भनी मेडिकलमा औषधि किनेर खुवाउन सल्लाह दिए । आउनजान एक घण्टा लगाएर औषधि किन्नु पर्‍यो । यस्तो कतिञ्जेल सहने ?’–लामाले भन्नु भयो ।

सामुदायिक अस्पातलले औषधि र सिरिञ्ज अभाव भएको भनी माग फारम पठाइएको छ । ‘उक्त औषधिहरू खरिदका लागि केही दिनमा रकम व्यवस्था गरी खरिद प्रक्रिया अगाडि बढाएर एक साता भित्रै औषधि पुर्‍याउँछौँ ।’–मुगुमा कार्मारोङ गाउँपालिका स्वास्थ्य शाखा निरीक्षक बलि बुढाले भन्नु भयो ।

जीवन सेजुवाल