समाचारहरू

नेपालको संविधान २०७२ को धारा ३५ मा प्रत्येक नागरिकलाई राज्यबाट आधारभूत स्वास्थ्य सेवा निशुल्क प्राप्त गर्ने हक हुनेछ  र आकस्मिक स्वास्थ्य सेवाबाट वञ्चित गरिने छैन भन्ने व्यवस्था गरिएको छ । सोही अनुरूपमा जिल्ला अस्पताल, सङ्खुवासभाले सामाजिक सेवा इकाइमार्फत २ हजार बढीलाई निशुल्क स्वास्थ्य सेवा र उपचार सेवा प्रवाह गरेको छ ।

सामाजिक सेवा इकाइमार्फत जिल्लाका विभिन्न लक्षित समूहका बिरामीले स्वास्थ्य उपचारको लाभ लिएका छन् । सामाजिक सेवा इकाइमार्फत ५० देखि शतप्रतिशतसम्म छुट दिने प्रावधान भएको जिल्ला अस्पतालका सूचना अधिकारी शेखर खत्रीले बताउनु भयो । स्वास्थ्य बीमा पनि गर्न नसक्ने विपन्न परिवारका बिरामीलाई सामाजिक सेवा इकाइले ठूलो राहत दिएको सूचना अधिकारी खत्रीले बताउनु भयो ।

सामाजिक सेवा इकाइमार्फत आर्थिक वर्ष ०८०-९८१ मा २ हजार ६ सय ३० जनाले सेवा लिएको जिल्ला अस्पतालका सूचना अधिकारी शेखर खत्रीले बताउनु भयो । सामाजिक सेवा इकाइमार्फत १ हजार ७ सय ७२ जना ज्येष्ठ नागरिक, अति गरिव ६ सय २२ जना,  लैङ्गिक हिंसा पीडित ७८ जना, थुनुवाकैदी ४४ जना, अपाङ्गता भएका ५१ जना, असाहय २४ जना,अन्य ३१ जना गरी २ हजार ६ सय ३० जनाले उपचार सेवा लिएको सूचना अधिकारी खत्रीले बताउनुभयो ।

सामाजिक सेवा इकाइमार्फत प्रदान गरिएको उपचार सेवामा सङ्खुवासभा अस्पतालको २८ लाख १२ हजार ९ सय ३७ रुपियाँ खर्च भएको अस्पताल प्रशानसले जनाएको छ । जिल्ला अस्पतालमा लक्षित समूहको स्वास्थ्यमा सुधार गराइ गुणस्तरीय स्वास्थ्य सेवामा पहुँच पुर्याउन लक्ष्यसहित २०७८ मा सामाजिक सेवा इकाइ स्थापना गरिएको हो ।

अस्पतालले सम्बन्धित लक्षित समूहको प्रमाणित गर्ने कागजपत्रको आधारमा निःशुल्क स्वास्थ्य उपचार गर्ने गर्दै आएको छ । जिल्ला अस्पतालमा हार्डजोर्नी विशेषज्ञ सेवा, बालरोग, सामान्य शल्यक्रिया, फिजियोथेरापीलगायतका सेवा सञ्चालनमा छ । जिल्ला अस्पतालमा गएको आर्थिक वर्षमा ६३ हजार ६ सय जनाले सेवा लिएका छन् । जिल्ला अस्पतालबाट स्वास्थ्य बीमा कार्यक्रमबाट गएको आर्थिक वर्षमा १८ हजार ८६ जनाले सेवा लिएका छन् ।

भविन कार्की