समाचारहरू

समयमा निकासा नहुँदा जिल्लामा सामाजिक सुरक्षाकोष भत्ता वितरणमा ढिलाई भएपछि सेवाग्राही मर्कामा परेका छन् । घटस्थापना आउनु १५ दिनु अगावै वितरण गरिसक्नु पर्ने भएपनि जिल्ला विकास समितिले समयमा बजेट निकासा नगरेपछि वितरणमा ढिलाई हुँदा सेवाग्राही मर्कामा परेका हुन् ।

एकल महिला, ज्येष्ठ नागरिक, अपाङ्गता, दलितलगायत लक्षित वर्गले पाउनुपर्ने सामाजिक सुरक्षा भत्ता समयमै वितरण नभएपछि सेवाग्राहीलाई समस्या भएको छ । घटस्थापनाको चार दिन बितिसक्दा पनि भत्ता आउने सुरसार नभएपछि दसैँ तिहार मनाउन समस्या हुने सेवाग्राहीले चिन्ता व्यक्त गरेका छन् ।

जिल्लाका ५४ ओटा गाविस, दुई ओटा नगरपालिकाका कसैले पनि सामाजिक सुरक्षा भत्ता पाएका छैनन् । साउनदेखि कार्तिकसम्मको पहिलो चौमासिक अहिलेसम्म पनि वितरण गर्न नसक्दा गाविस सचिवहरूलाई सेवाग्राहीले र्‍याख्र्‍याख्ती पार्ने गरेको रानीवास गाविसका सचिव सुरेशकुमार ढुङ्गेलले बताए । जिल्ला विकास समितिले चार्डपर्वलाई ध्यान दिएर चाँडै निकासा गर्नुपर्नेमा यसवर्षढिलाइ गरेकाले समस्या भएको उनले बताए ।

जिल्ला विकास समितिले भने अर्थ मन्त्रालयबाट गाविसका लागि प्रशासनिक खर्चसहित सामाजिक सुरक्षा कोषको पहिलो चौमासिक रकम पठाउन ढिला गरेकोले निकासमा ढिला भएको जनाएको छ । जिल्ला विकास समितिका लेखा अधिकृत सन्तोष श्रेष्ठका अनुसार भर्खरै सामाजिक सुरक्षा भत्ताको रकम भर्खरै निकासा गरिएको र चाँडै वितरण हुने बताए । अहिलेसम्म पनि भत्ता नपाएपछि ज्येष्ठ नागरिकहरूलाई दशैँ मनाउन तयारी गर्न समस्या भएको ज्येष्ठ नागरिक समाज भोजपुरका अध्यक्ष श्यामकुमार खड्काले बताए । राज्यले दिएको सुविधालाई समयमा प्रयोग गर्न पाएमात्रै ज्येष्ठ नागरिकहरूलाई सहुलियत हुने भएकाले बेलैमा सम्बन्धित निकायले ध्यान दिनुपर्ने खड्काको प्रतिक्रिया छ ।

किरण राई