समाचारहरू

जुगल गाउँपालिका– ३ मा रहेको तेम्बाथान, दिपु, तेगा र साङतुङ गाउँका ज्येष्ठ नागरिकहरु गाउँमा सडक यातायातको अभावले सामाजिक सुरक्षा भत्ता लिन दुई दिन पैदल हिँडेर वडा कार्यालय पुग्नुपर्ने बाध्यता रहेको छ ।

यस गाउँका ज्येष्ठ नागरिकहरु सामाजिक भत्ता बुझ्नकै लागि दुई दिन पैदल हिँडेर पाँङ्गार्पु पुग्नुपर्दछ । त्रैमासिक रुपमा सरकारले दिँदै आएको भत्ता लिन बिहान पाँच बजे घरबाट हिँड्दा बेलुकी मात्र वडा कार्यालय पुगिन्छ र बास त्यहीँ बस्नुपर्ने जेष्ठ नागरिक दावादोर्जे शेर्पाले बताउनु भयो ।

१ सय १० घर धुरी रहेको यहाँको बस्तीका ज्येष्ठ नागरिक, अशक्तलाई सरकारले दिँदै आएको सामाजिक सुरक्षा भत्ता लिन निकै सास्ती छ । यस अघि सम्बन्धित वडा कार्यालयबाट घरमै ज्येष्ठ नागरिकले सामाजिक सुरक्षा भत्ता लिँदै आएकोमा सरकारले बैकिङ्ग प्रणालीबाट दिन सुरु गरेपछि दुर्गम गाउँका नागरिकहरुलाई ठूलै सास्ती परेको तेम्बाथानका ज्येष्ठ नागरिक आशापाल लामाले बताउनुभयो ।

जिल्लाको उत्तरी भेगमा पर्ने जुगल हिमालको फेदीमा रहेको गाउँमा पुग्न मोटर पुग्ने बिन्दु बोल्देबाट एक दिनको उकालो बाटो हिँड्नु पर्छ । सडकले गाउँ नजोडिएका कारण तेम्बाथान, दिपु, तेगा, साङतुङ बस्तीका मानिस भत्ता लिन दिनभरीको बाटो हिँडेर वडा कार्यालयमा पुग्छन् । फर्कदा फेरी दिनभरीको बाटो हिँडेर घर पुग्द्छन् ।

तेम्बाथान, दिपु, तेगा र साङतुङ गाउँका ज्येष्ठ नागरिकहरुलाई सामाजिक सुरक्षा भत्ता लिन समस्या भएपछि आफूले ढाडे बजारमा रहेको बैङ्कका कर्मचारीलाई तीन महिनाको दुई दिन वडा कार्यालयमा ल्याएर भत्ता वितरण सुरु गरेको जुगल गाउँपालिका– ३ का वडाअध्यक्ष लक्ष्मण दोङले बताउनु भयो ।

नातिबाबु धिताल