समाचारहरू

पुर्विचौकी गाउँपालिकास्थित सनागाउँ पशुसेवा शाखामा औषधि नभएपछि आफूहरुले समस्या भोग्नु परेको त्यस क्षेत्रका कृषकहरुले गुनासो गर्नु भएको छ ।

पुर्विचौकी गाउँपालिकास्थित सानागाउँ पशुसेवा शाखामा पशुचौपायहरु बिरामी पर्दा प्रयोग गरिने औषधि गत असार महिनादेखि नपाउँदा समस्या भएको स्थानीय कृषकहरुले गुनासो गर्नु भएको हो ।

सरकारले कृषकहरुलाई २० प्रकारको औषधि निःशुल्क दिने व्यवस्था गरेको भए पनि सनागाउँ पशुसेवा शाखामा कुनै प्रकारको पनि औषधि नभएको भन्दै शाखाका कर्मचारीहरुले कृषकहरुलाई रित्तो हात घर पठाउने गरेको स्थानीय कृषक रामबहादुर खड्काले गनुासो गर्नु भयो ।

उहाँले भन्नु भयो–‘पशु व्यवसाय गरेर जिविकोपार्जन गर्ने कृषकहरुलाई समस्या उत्पन्न भएको छ । पशुचौपायहरु बिरामी पर्दा पशुसेवा शाखाबाट कुनै पनि प्रकारको  सेवा पाउन सकिएको छैन् । पशुचौपायका लागि निःशुल्क वितरण गर्दै आएको घाउ खटिरा, चोटपटक लाग्दा सिलाउने धाँगो, लट्याउने सुई, दुखाई कम गर्ने औषधि, ज्वरो, निमोनिया, झाडापखालाको औषधि शाखामा छैन् । गाई, भैंसी तथा बाख्रा ब्याउन नसकेमा लगाई दिने सुई समेत किसानले पाउन सकेका छैनन् । बिरामी भएका पशुचौपायहरुको उपचार हुन नसकेपछि मृत्यु समेत हुने गरेको छ ।’

पशुचौपायका लागि निःशुल्क वितरण गरिदै आएका जुम्रा, उपियाँ, नाम्ले, जुका लगायतका २० प्रकारकार औषधि मध्ये अहिले कुनै पनि औषधि पशुसेवा शाखामा नभएपछि स्थानीय कृषकहरुले समस्या भोग्नु परेको पशुसेवा शाखाका प्रमुख शंकर साउदले बताउनु भयो ।

पशुचौपायहरु बिरामी भएको भन्दै औषधि उपचार गराउन आउने कृषकहरु औषधि नलिकनै फर्किने गरेको र औषधि उपलब्ध नगराएको भन्दै दैनिकजसो आफूलाई गुनासो गर्दै आएको पशुसेवा शाखाका प्रमुख साउदले बताउनु भयो ।

शाखामा औषधि नहुँदा स्थानीय कृषकहरुलाई समस्या उत्पन्न भएकोले औषधि उपलब्ध गराउन पशुसेवा माहाशाखामा अनुरोध गरिएको भए पनि एक महिना बितिसक्दा समेत समस्या समाधान हुन नसकेको पशुसेवा शाखा, सनागाउँका प्रमुख साउदले बताउनु भयो ।

प्रेमबहादुर भण्डारी