सादा पोशाकका प्रहरीद्वारा हवाइ फायर, तीन प्रहरी घाइते

  ०७९ भदौ ९ गते

बलान बिहुल गाउँपालिका–४ बेल्हीका घुरन साहको घर खानतलासी गर्न स्थानीयले अवरोध गरेपछि भदौ ७ गते प्रहरीले तीन राउण्ड हवाइ फायर गरेको छ ।

तस्करी गरी समान राखिएको साहको घर खानतलासी गर्न स्थानीयलाई सम्झाउँदा नमानेपछि र प्रहरीमाथि ढुङ्गामुढा गरेपछि प्रहरी र सादा पोशाकका युवकले ३०३ राइफल र सर्टगनबाट तीन राउण्ड हवाइ फायर गरेका हुन् ।

स्थिति अनियन्त्रित हुँदै गए पछि इन्स्पेक्टर नबिन थापाको निर्देशनमा प्रहरीहरूले हवाइ फायरका लागि गोली लोड गरिरहेका बेला सादा पोशाकका व्यक्तिले महिला प्रहरीको हातबाट बन्दुक खोसेर कहिले भीडतर्फ त कहिले आकाशतिर तेर्‍स्याउँदै हवाइ फायर गरेका थिए ।

बन्दुक उज्याउने र हवाइ फायर गर्ने व्यक्ति सादा पोशाकका प्रहरी भएको डिएसपी माधवप्रसाद काफ्लेले सप्तरी इन्सेक प्रतिनिधिलाई जानकारी दिनु भयो ।

इन्सेक प्रतिनिधिको प्रश्नको उत्तर दिनुहुँदै प्रमुख जिल्ला अधिकारी जनार्दन गौतमले सादा पोशाकका प्रहरीले बन्दुक चलाउने, उज्याउने काम गर्न नमिल्ने बताउनु भयो । उहाँले संवेदनशील घटना भएकाले घटनाको छानविन गरिने बताउनु भयो ।

स्थानीयवासीको ढुङ्गामुढाबाट प्रहरी सहायक हवल्दार शिवशङ्कर साह, प्रहरीहरू अनिलकुमार बस्नेत र विशालकुमार मिश्रा सामान्य घाइते भएको जिल्ला प्रहरी कार्यालय सप्तरीले विज्ञप्ति जारी गरी जनाएको छ ।

विज्ञप्ति अनुसार साहको घुँडामुनी, बस्नेतको छातिमा र मिश्राको टाउकोमा चोट लागेको छ । हवाइ फायर पछि भीड तितरबितर भएको र साहको घरबाट अवैध समान बरामद गरिएको छ ।


मनोहरकुमार पोखरेल