समाचारहरू

नलगाड नगपालिकाको प्राथमिक नगर अस्पतालले त्रिपालमुनिबाट सेवा प्रवाह गरिरहेको छ ।  गत वर्ष कात्तिक १७ गते मध्यरात गएको विनाशकारी भूकम्पले नलगाड नगरपालिका स्थित नगर अस्पताल भवन भत्किएपछि ७ महिना वित्दासमेत मर्मत नभएपछि त्रिपालमुनिबाट सेवा प्रवाह दिदै आएको हो । त्रिपालमुनिबाट सेवा प्रवाहमा सेवाग्राहीलाई समस्या भएको छ ।

६ बर्षीया छोरी जेनिशा रावलत बिरामी भएर उपचारका लागि नगर अस्पताल ल्याएपछि स्वास्थ्यकर्मीले भर्ना गर्न सल्लाह अनुसार तीन दिनदेखि नगर अस्पतालमा उपचार गराइ रहेकी छु । स्वास्थ्य सेवा त्रिपालबाट प्रवाह भएकाले दिउसो गर्मी भएपछि  बिरामीलाई सास्ती हुने गरेको छ । त्रिपालको बसाइँ भर्ना भएका बिरामी दिउसो बस्न नसक्ने अवस्था रहेको नलगाड नगरपालिका–४ की ललिता रावलले गुनासो गर्नुभयो ।

भूकम्पले दुई ओटा अस्पताल भवनमा क्षति पुगेपछि बिरामीलाई  औषधि उपचार गर्न पाँच ओटा त्रिपाल टाँगेर ओपिडी, इमरजेन्सी, बिरामी भर्ना वार्ड, आँखा सेवा, विएन्सी सेवा त्रिपालबाट प्रवाह गरिएको छ । एउटा पक्की भवन बाँकी दुई ओटा कच्ची भवनबाट सेवा प्रवाह गरेको नलगाड नगरपालिकाको प्रशासनिक केन्द्र स्थित दल्ली नगर अस्पतालका दुई ओटा भवन भत्किएपछि सेवा प्रवाहमा समस्या भएको हो । पक्की भवनबाट फार्मेसी, ल्याव, सुत्केरी, सुरक्षित मातृत्व र डिस्पेन्सरी सेवा सञ्चालन गरिएको छ ।

नगर अस्पतालमा दैनिक एक सय भन्दा बढी बिरामी आउने गरेका छन् । बिरामीको चेकजाँचका लागि प्रर्याप्त उपकरण नहुँदा जाजरकोट अस्पताल, चौरजहारी अस्पताल, प्रदेश अस्पताल सुर्खेत, नेपालगञ्जका अस्पतलमा रिफर गर्नु परेको नगर अस्पताल दल्लीमा कार्यरत डा.नविन ध्यारले बताउनु भयो ।

प्रदेश सरकारबाट डा. नविन ध्यार, नगरपालिकाको आन्तरिक स्रोतमा तलव भत्ता खानेगरी दुई जना मेडिकल अधिकृत कार्यरत छन् । एक्सरे सेवा नभएपछि बिरामीलाई बाहिर रिफर गर्नु परेको छ । एक्सरे मेशिन नहुँदा यहाँका सर्वसाधारण बिरामीले दुख पाउने गरेका छन् ।

डा. ध्यारका अनुसार भौगोलिक विकटता दुर्गम बस्तीबाट आएका बिरामीलाई चेकजाँचका लागि उपकरण नहुँदा बाहिर पठाउनु पर्ने बाध्यता छ । स्थानीय तह, प्रदेश सरकारले उपकारणको व्यवस्था गरिदिएपछि ग्रामीण बस्तीका जनतालाई स्वास्थ्य सेवा प्रति विश्वास दिने बताउनु भयो । भूकम्पले भवन भत्किएपछि त्रिपालमुनी सेवा दिनु परेको छ त्यसैमा पनि उपकरण नहुँदा सेवा प्रवाहमा समस्या हुनुको साथै सेवाग्राहीले सास्ती पाएका छन् । सरोकारवाला निकाय नलगाड नगरपालिकाले अस्थायी भवनका लागि पहल नगरेका कारण सर्वसाधारणले दुख पाएका छन् ।

एम्बुलेन्स चालक सहित ३० जना कर्मचारी कार्यरत नगर अस्पतालमा दरबन्दी अनुसारका स्वास्थ्यकर्मी छैनन् । हिउँदको चिसो, चैत, वैशाखको गर्मी त्रिपालमुनिबाट सेवा प्रवाह गर्दा बिरामी र स्वास्थ्यकर्मी समस्यामा परेका छन् ।

चिसो र गर्मी समय त्रिपालबाटै सेवा प्रवाह गरियो अब बर्खाको समय आउदै छ त्रिपालमुनिबाट बिरामीलाई कसरी सेवा दिने भन्ने चिन्ताले सताउन थालेको स्वास्थ्यकर्मी रामबहादुर बटालाले बताउनु भयो । उहाँले भन्नु भयो ‘नगर अस्तालको भवन समयमा बन्ने अवस्था छैन । बर्खामा बिरामी  र स्वास्थ्यकर्मीले दुख पाउने निश्चित छ । अस्थायी टहरा भएपनि राहत हुने थियो त्रिपालले बर्खाको पानीलाई छेक्ना गाह्रो छ ।’

बासुदेव शर्मा